Awe, 9 di september 2020, Club Kibrahacha 60+ ta celebra nan di 35 aniversario, y Rotary Club Aruba kier a tuma e oportunidad pa felicita e staf y boluntarionan.
Na cuminsamento di añanan 80, Rotary Club Aruba a adopta un mocion pa hasi un sondeo di e necesidadnan di nos comunidad. E sondeo ehecuta pa Rotary Club Aruba a resulta cu nos grandinan den nos comunidad falta di atencion. Of mihor bisa, no tabata tin actividadnan pa nos grandinan di edad 60 bai ariba. A base di e sondeo aki Eric D’Arnault, miembro di Rotary Club Aruba a lidera e initiativa pa establese un fundacion nobo pa Aruba cu lo focus ariba nos grandinan den nos comunidad. Asina aki “Fundacion Centro Pa Nos Grandinan” a wordo establesi na 1983. E fundacion aki hunto cu cooperacion di Gobierno di Aruba tabata tin e meta pa bin cu un centro cu actividadnan pa nos grandinan den e bario di Piedra Plat. E edificio, mihor conoci como “Centro Kibrahacha”, a keda inaugura dia 9 di september 1985.
Desde su inauguracion na 1985 te cu awo, Club Kibrahacha 60+, ta ofrece diferente actividad pa nos grandinan. Actividadnan ta varia di bingo, handenarbeid, yoga y cardio fit. Tambe tin un lugar unda nos grandinan por planta mata y tambe hasi ehercicio. Club Kibrahacha ta keda inova y asina aki a introduci un paar di aña pasa lesnan pa hasi uso di internet.
Rotary Club Aruba te cu dia di awe ta forma parti di Club Kibrahacha 60+ na unda cu miembronan di Rotary ta fungi como miembronan di directiva di e fundacion. Un parti di e fondonan cu ta wordo recauda cu eventonan di Rotary, manera Golf Tournament y Fiesta Rotaria, ta destina pa Club Kibrahacha 60+. Tur aña e famia di Rotary Club Aruba hunto cu Rotaract Club Aruba y Interact Club Aruba ta yuda como boluntario na e bazaar organisa pa Club Kibrahacha 60+.
Rotary Club Aruba ta hopi orguyoso di e staf y boluntarionan cu ta forma parti di e fundacion aki. Nos ta felicita nan cu e di 35 aniversario y pa sigui cu e bunita trabao cu nan ta hasi pa nos grandinan.
