Home Politics Parlamentario Arthur Dowers Ley di screening ta depende di sinceridad di formado...

Parlamentario Arthur Dowers Ley di screening ta depende di sinceridad di formado y Prome Minister

SHARE

Siman cu a pasa parlamentario pa fraccion di AVP, Arthur Dowers, a tuma nota di un declaracion haci pa Minister di Finansa, Xiomara Ruiz Maduro, kende relaciona cu henter e letania cu Minister Marisol Lopez Tromp a duna contra di e actual gobierno.

Sr Dowers a mustra entre otro cu Minister Ryuiz Maduro den un reaccion riba e ponencianan di su colega Marisol riba corupcion den e actual gobierno, a bisa cu Minister Marisol eigenlijk tampoco ta un hende ‘zuiver.’
Segun e parlamentario, e reaccion aki a bin di parti di e Minister di Finansa despues cu su colega di infrastructura a divulga un serie di decisionnan incorecto y contra tur regla y ley existente, no solamente di su ex colega di partido kende el a reemplasa pero tambe di mas miembro di e gabinete Wever Croes kendenan lo ta tuma decisionnan cu no ta bon.
“Claramente Minister Ruiz Maduro a dicidi di Sali y bin acusa Minister Marisol cu eigenlijk su persona mes no ta un pesona zuiver y cu Marisol mes lo ta meti den cosnan cu Marisol no ta inocente y cu Marisol tambe lo a comete actonan cu no ta bon, pues cu por wordo considera actonan di corupcion.
Mi ta trece e puntonan aki na atencion di comunidad ya cu mi a ripara cu tanto Minister Marisol Lopez Tromp como e Minister di Finansa Ruiz Maduro, ta pretende cu nan a pasa un screening y cu e proceso aki ta haci cu tur hende cu a bin den e gobierno actual, ta hendenan drechi.
Sinembargo na mes momento tanto Ruiz Maduro bisando cu Marisol no ta hende drechi, ta mustra cu eigenlijk e screening cu nan a pasa no ta un screening cu ta percura pa pone hende drechi den gobierno.
Di otro banda Minister Marisol a mustra bon cla cu tin hopi hende cu ta meti den cosnan cu no ta bon den e gobierno actual, cu practicamente mester bay cuestiona e sistema di screening.”

Parlamentario Arthur Dowers a sigui mustra cu e ta tende e politiconan aki bisa cu e sistema di screening cu a wordo usa ta asina importante cu ta haci cu gobernacion na Aruba ta uno sin corupcion.
Sinembargo pa e miembro di parlamento pa fraccion di AVP, e pensamento aki ta un locura mirando tur loke a bin ta pasando den ultimo siman y lunanan den e actual gobierno di coalicion.
“Mi persona tambe a pasa den e sistema di screening aki y den cierto sentido y tin un logica cune pa wordo haci pero sinembargo ta un berdad tambe cu esaki no ta un garantia cu tur mandatario ta zuiver.
Esun cu tin cu percura pa no haya y tin cu preveni pa hendenan corupto den gobierno, ta e Minister Presidente ya cu su persona como formado, ta haya resultado di e screeningnan.
Kico a resulta cu den caso di e actual gobierno aki, e Minister Presidente tabata sa masha bon y nos a scucha esaki na varios ocasion, cu tabatin dos Minister riba cual tabatin duda.
Pero dor cu e screening ta bisa obhetivamente cu ta solamente si un persona ta ‘aangemerkt’ como un ‘verdachte’ den un strafzaak, si e persona akia wordo setencia di un crimen, of si e persona aki debe belasting, e ora e no por bira Minister.
Pero tur e otro asuntonan caminda tin duda den integridad di un hende, no ta stroba e hende di bira Minister dor di un screening pero esun cu tin cu actua na momento cu bin duda riba integridad di un hende na momento di screening, ta e Minister Presidente.
Pero kico nos por a mira, cu Minister Presidente Evelyn Wever Croes a scohe pa un hende cu su persona y partido a denuncia na Ministerio Publico, un hende cu su persona mes a yama pa corupto y sushi den pasado, el a bira brasa e hende aki y bay goberna cune.
Pasobra e tabata sinti cu esaki tabata su unico chens di drenta den gobierno number uno y cu ta co chens pa e bay comete fechorianan den gobierno.
Si el a drenta den gobierno cu hende drechi, e hende drechi aki ta bay tira bista riba e gobierno y lo ta dificil pa e haci su bainanan pero ora cu bo drenta den gobierno cu hechado di baina y ora cu esakinan ta haci nan bainanan, abo ta bira cara otro banda y tambe bay haci bo bainanan.
Riba dje Prome Minister no a actua na momento cu señalnan a bin cu den su gabinete tabati dos Minister cu no por a bira Minister y tur esaki pa motibo cu nan tabata tin relacionnan dudoso y ora cu bay mira cu kende e hendenan aki ta anda den nan bida priva, lo por compronde di con e hendenan aki no por a bira Minister.
Un di nan sigur y e otro tabatin asina hopi duda riba su reputacion caminda ya caba tabata papia hopi riba cosnan cu e tabata haci y cosnan cu a Sali na cla ora cu el a Sali for di un partido y lanta su propio partido, caminda a bira hopi cla tambe cual tabata e meta cu el a lanta e partido aki.
Eseynan tabata suficiente ‘red flags’ banda di hopi otro contacto cu e persona aki tabatin cu ta hopi dudoso, cu mester tabata suficiente pa un persona como formado bisa cu e hendenan aki no por ta den gobierno.
Pero Evelyn Wever Croes no por a para contra e hendenan di POR pa bira Minister, pasobra e ora lo no tabatin gobierno y tur loke ta pasando actualmente, ta cosnan cu nan mes a yega di denuncia caba den pasado y tambe cu a wordo alerta dor si AVP y na e momentonan aki tin invetigacion andando contra di e persona aki,” Parlamentario Arthur Dowres a declara.