Home » Minister Xiomara Maduro ta informa: Rapport positivo di CAFT riba e cifranan di segundo kwartaal 2020 di Pais Aruba

Minister Xiomara Maduro ta informa: Rapport positivo di CAFT riba e cifranan di segundo kwartaal 2020 di Pais Aruba

by Admin
0 comment 48 views

Oranjestad – Minister Maduro a comparti informacion tocante di CAFT su opinion riba e cifranan di segundo kwartaal di Pais Aruba. E mandatario a informa cu CAFT a haya positivo cu Gobierno a brinda mas informacion y splicacion den e ‘Uitvoeringsrapportage’ y a duna un bon bista di e trabounan cu ta wordo haci.

Resultado financiero
E deficit segun e cifranan di e segundo kwartaal ta 269 miyon florin. E mandatario ta informa cu esaki ta premira di ta e resultado mas malo pa aña 2020. CAFT ta di opinion cu e resultadonan den e siguiente kwartaalnan por bira un tiki mas miho ya cu Pais Aruba a habri su frontera y economia a cuminsa lora un poco. Banda di esaki si Pais Aruba sigui ricibi e yudansa financiero di Subsidio di Salario di Hulanda esaki tambe lo tin un efecto positivo riba e Presupuesto 2020 y lo yuda pa haci e deficit mas chikito cu locual ta ser premira.

Entrada tabata mas halto cu a premira
E dignatario ta enfatisa cu Pais Aruba lo a habri aña 2020 cu entradanan mas halto cu locual a ser premira, si COVID19 no a presenta. Pais Aruba su finansa tabata bayendo den bon direccion pero lamentablemente a bini e crisis di likides. E mandatario a informa cu pa locual ta entrada di Gobierno pa e dos prome kwartaalnan a subi. Impuesto directo a subi cu 27%, esaki ta primordialmente door di Loonbelasting specialmente e primanan cu mester a wordo paga di e Subsidio di Salario a contribui na e subida. Hunto cu esaki Gobierno a ricibi mas entrada tambe door di a flexibilisa e maneho di dividendo.
E contribuccion di impuesto indirecto ta 19% mas halto cu a premira y esaki ta door cu a habri frontera Pais Aruba a ricibi mas invoerrechten y BBO.

Gastonan ta mas halto
E gastonan ta 130 miyon florin mas halto compara cu aña 2019. Esaki ta door di e crisis di COVID19 na unda Gobierno mester a duna un ayudo financiero den forma di FASE y Sosten Financiero na Negoshinan Chikito y Mediano. Alabes Gobierno mester a yuda AZV y SVB cu extra fondo.

Reduccion di gastonan di personal
Pa locual ta e gastonan di personal CAFT ta indica cu esakinan a baha manera tabata premira. CAFT ta di opinion cu Gobierno a brinda mas splicacion y a presenta e informacion na un manera diferente den cual ta duna un bon bista di tur trabou cu ta wordo haci. E mandatario ta informa cu esaki ta conforme tur locual cu Gobierno a bin ta haci y tambe door di e esfuerso cu e empleadonan publico a haci di a entrega parti di nan salario. CAFT ta di opinion cu Pais Aruba por cumpli cu e norma di 476 miyon florin pa aña.

Inversion
Gobierno a presupuesta 40 miyon florin pa inversion y solamente 1 miyon florin a wordo usa pa inversion den e segundo kwartaal door di e situacion di crisis cu nos ta aden. Banda di esaki e sosten financiero cu Pais Aruba a ricibi di Hulanda no tabata contene e parti di inversion. CAFT a conseha Gobierno pa haci un peticion pa e fondo di likides den e ultimo kwartaal pa por realisa e inversionnan.

Necesidad financiero y debe
CAFT a indica cu Gobierno di Pais Aruba a ricibi autorisacion di Conseho di Minister di Reino pa haci prestamo riba mercado capital internacional. Pais Aruba a ricibi e fondonan aki pa cumpli cu e pago di debe y e interes di e debe. Actualmente e debe di Pais Aruba ta na 4.7 mil miyon florin incluso e prestamo di 205.5 miyon florin cu Pais Aruba a ricibi di e prestamo di Hulanda den e prome y di dos tranche.

Maneho financiero
CAFT ta conseha pa Parlamento trata y aproba e Cuentanan Anual di Pais Aruba di añanan 2016, 2017 y 2018. Gobierno tin cu entrega e Cuenta Anual 2019 na Parlamento pa asina por comproba e surplus di aña 2019. Alabes CAFT a pidi mas splicacion necesario pa e ‘nulmeting’ pa por controla Cuenta Anual di Pais Aruba pa asina por haya un declaracion di accountant den aña 2020.

Avance positivo
Aruba a conta cu avance positivo riba e tereno di maneho financiero den aña 2019 na unda cu a haya evaluacion positivo di Fitch, Standard and Poor’s y IMF. Despues di 12 aña Aruba a cera aña 2019 cu un surplus chikito y pa aña 2020 tabata premira un surplus di 46 miyon florin. E logro aki ta danki na tur experto, Parlamento y Pueblo di Aruba. E mandatario ta finalisa bisando cu CAFT ta di opinion cu e cifranan di e segundo kwartaal ta mas miho cu a wordo premira y Pais Aruba por cera aña 2020 cu menos deficit cu a ser pronostica. Por lesa e rapport di CAFT completo riba www.cft.cw

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio