Home Politics Ex Prome Minister Nelson Oduber: “Hulanda kier obliga nos bula den un...

Ex Prome Minister Nelson Oduber: “Hulanda kier obliga nos bula den un piscina sin awa!”

SHARE

A peticion pa informa pueblo tocante nos relacion den Reino Hulandes laga mi purba duna un splicacion di henter e relacion aki. Prome aya nos tabata colonia di Hulanda sin autonomia. Hasta nos situacion tabata wordo categorisa como “Nederland en aanhorigheden in de West”. Despues di segundo guera mundial cu Reina di Hulanda mes a bay opera desde London y despues cu Merca, Australia, Canada y New Zeeland a libera parti di Europa for di e Alemannan, e Reina den un discurso a priminti di duna Antias autonomia. Esaki pasobra Hulanda – pa por tin colonia – mester a raporta na e comision di Nacionnan Uni pa decolonisacion. E historia di e proceso a yega na e Statuut di 15 december 1954, unda porfin nos no tabata colonia mas, pero un pais autonomo. E historia perfecto di esaki ta describi den e buki di mr. W.H. van Helsdingen, “Het Statuut voor het Koninkrijk der Nederlanden”. Eyden tin para pakico Hulanda a duna nos autonomia y con cos a bay cu e rol di e prominentenan aki banda cu a negocia algo historico pa nos cu awe mas cu 60 aña despues ta existi ainda.

Hulanda tabata aproba tur prestamo
Fuera di cambionan na 1975 pa Surnam bira independiente y Aruba haya Status Aparte na 1986 y 10-10 pa Corsou y Sint Maarten tambe haya mescos no tabata tin cambionan fundamental. Fuera di articulo 3 di Statuut cu ta menciona na un forma limitativo e tareanan cu ta di Reino e tempo ey Antias a bira autonomo ariba tur otro tereno, fuera segun art. 29 di Statuut cu pa e pais fia placa mester aprobacion di gobierno di Reino. Cu aña e cooperacion a base di articulo 36 di Statuut tabata tuma lugar cu ayudo cu placa pa proyectonan den e pais. E ayudo tabata caracterisa su mes como uno di duna “gebonden ontwikkelingshulp” cu al final Hulanda tabata dicidi cual proyecto si y cual no! Durante tur e añanan di autonomia Hulanda mes a crea un relacion cu nos tur ta keda dependiente di Hulanda y nos no a logra di bira “self supporting” y no a yuda stimula den ningun forma “zelfredzaamheid”.Tur prestamo cu awe nos tur mester paga ta gobierno di Reino (Hulanda) a aproba tur den Conseho di Ministro di Reino! Aruba a haya su mes ultimo añanan fuera di e Mega debe cu tur hende tabata sa cu un economia asina chikito manera di nos lo no por produci suficiente placa pa paga debe, e interes y mantene e “huishouding”. Siguientemente, ata e pandemia a dal nos na un forma devastador.

Presupuesto cu surplus di 46 miyon
Hulanda desde 2015 tabata sa cu cos lo tranca, A bin cu KB y CAFT, pero no obstante esaki, cos a bira peor na 2016/17 cu e debe a ser aumenta cu casi 2 biyon florin extra door di e PPP-proyecten y pa cual CAFT a pidi pa no firma ningun! A bin cambio di gobierno na fin 2017 cu a cremencha aki aya, hasta a yega na un presupuesto 2020 cu un surplus di 46 miyon florin. Y te hasta CAFT a conseha pa fia Aruba e proximo tranche pa motibo di e pandemia. E actitud di Knops cu e 2 Rijkswetnan no a laga espacio alguno pa nos fundamento estatal cu ta nos autonomia financiero/economico! Ya caba Hulanda tin segun art. 29 di Statuut tur e instrumentonan legal pa e control cu nos no por fia den exterior sin nan aprobacion y nan sa cu nos banconan no tin e sumanan grandi pa fia nos tampoco. Hulanda sa cu nan tin nos den un situacion delicado.

Mester di 2/3 parti di tur parlamento
Gobierno ta den un situacion cu cual decision nan tuma toro lo cacha nos tur y Hulanda kier obliga nos bula den un piscina sin awa! Mirando e actitud di Hulanda lo siguiente. Locual Knops ta exigi lo bay back fire. Na promer lugar, ni e gobierno di Aruba ni esun di Corsou y ni di Sint Maarten tin sosten den parlamento di 2/3 y hasta ta mayoria minimo tin! Na Hulanda tambe e gobierno tin mayoria minimo y hasta den Eerste Kamer no tin mayoria mes. Cual politico ta bay yuda forma e 2/3 di sosten pa e 2 Rijkswetnan aki? Kamikaze politico e lo comete! Otro aña tin eleccion na Hulanda y gobierno por cambia di signatura y na Aruba tambe tin eleccion y na Corsou tambe. Ningun politico tin bola di cristal pa mara e proximo gobierno. Pa pasa e Rijkswetnan mester di 2/3 parti, cu ningun di e 4 gobiernonan no tin. “Ta ki Hulanda kier pa e gobierno dicidi pa parlamento?” Ami ta kere cu a base di articulo 38 di Statuut nos por logra – si Hulanda tin e boluntad politico pa un cooperacion mas estrecho – pa haya e placa fia cu mas control pa yuda fortifica nos democracia cu mas sosten pa nos institutonan y protocolnan ariba varios tereno. Nan sa cu nos mester di e placa y nos sa cu nan kier mas control y ta den esaki mester por haya otro. Negocia cu mas comprension y yega na e mesun meta y resultado final unda nos tur lo por keda biba cu ne!

Pakico purba impone algo cu no tin sosten pe?
Mi ta kere mester por yega na un acuerdo a base di respeta otro su posicion y si no por y Hulanda impone esaki lo no funciona tampoco! Mi ta garantisa nan cu e monstruo aki lo no traha ni funciona aki! Nos pueblonan lo no acepta esaki di perde tur locual 40 aña nos tur a lucha pe! AVP den pasado a acepta e 12-8 impone pa Hulanda y nunca mas despues pa mas cu 40 aña nan no a gana un eleccion. Esaki tabata den e decadanan 50, unda na Aruba 2.147 hende a firma pa Separacion y Hulanda a obliga nos cu un Interim- Regeling, unda nos lo a haya un “zelfbestuur“, mediante un Eilanden-Regeling cu ningun poder pa desaroya ni financiera ni economicamente, cu un Eilandsraad y 6 diputado cu tabata nos gobernantenan local cu masha poco poder! 75% di tur nos placa genera aki na belasting mester a ser traspasa pa e gobierno Central y nos no tabata por a duna ningun incentivo pa por a desaroya economicamente nos propio destino. Pakico si bo sa cu nos gobierno no tin 2/3 den parlamento pa pasa e 2 Rijkswetnan ni na Aruba ni na Corsou ni na Sint Maarten, pakico purba impone algo cu no tin sosten pe? No tin ningun caminda “draagvlak” politico pa e dos “monstruo” di Rijkswetnan aki. Ni gobierno di Hulanda tin 2/3 di sosten. No tin politico cu por garantisa esaki tampoco! Esaki ta un contribucion pa pone bo pensa y discuti cu argumento.