Lo ta bon pa esnan cu por a lubida den un sinopsis mi pone e casonan, unda nos mester a lucha pa tur locual nos ta y tin te ainda.
Den e decadanan 40 tabatin un peticion pa “Separacion”, unda despues cu 2147 Arubiano a firma pa esaki nos a ser engaña cu nos por drenta e constelacion Antiyano a base di igualdad den Staten y cual igualdad di 8-8 a ser cambia pa 12-8 y a hinca nos den un Interim Regeling cu a dura te 31 december 1985. E historia ey, unda nos a ser engaña pa casi 40 aña cu algo ‘interino’ cu a hunga un rol politico pa hopi aña cu e resultadonan di eleccion. Puntra e hendenan di AVP cu casi nan partido a desaparece di pantaya politico!
Promesa di un Man Comunidad
Despues di 1971 a start un movimiento MEP pa Status Aparte cu a ser corona cu exito dia 12 di maart 1983 na e Conferencia di Mesa Rondo bou guia di awe den feliz memoria Betico Croes. Atrobe a mara e Status Aparte na un fecha di independencia di 1 jan. 1996 cu e promesa di lo duna nos un Man Comunidad Sui Generis cu yen di garantia.
Ora nos a drenta gobierno na 1989 y a bay pidi pa e garantianan pa cuminsa e proceso pa independencia, Hulanda a bisa cu lo mester ehecuta tur e 33 puntonan di 12 di maart 1983 of no tin garantia. E ora nos a dicidi cu nos no ta bira independiente sin garantia y a firma dia 13 di juli 1990 pa saca e fecha di independencia for di Statuut di 1996, pero manteniendo si e derecho di autodeterminacion, cu si un dia e mayoria di pueblo kier bira independiente nos na un forma responsabel, organiza y ordena por bira independiente.
Relacion LGO
Durante e 4 gabinetenan cu mi a guia, Hulanda a purba hopi cos cu nos a logra para nan. Hulanda a bin cu e proposicion pa nos drenta Union Europeo enbes di un relacion LGO, cambi’e pa UPG, unda nos lo perde nos autonomia financiero/economico. Nos a bataya y a gana esaki tambe.
Un Gobernador y un Procurador General
Tempo di preparacion di Status Aparte pa Corsou, Hulanda a bin cu e proposicion pa nombra un gobernador pa nos tur y nos a rechaza esaki. Tambe cu lo bin cu un procurador general pa nos tur y cu argumentonan legal cu esaki no por, nos a gana esaki tambe. Ministro di Husticia di Hulanda a bin cu e proposicion cu e ta ministro di Reino y cu e por duna nos procurador general “aanwijzing”. Nos a pidi conseho di Raad van State cu a duna nos razon y a logra para esaki.
Kustwacht y Radar
Tempo di nos gobierno colega Rudy Croes – mirando e problema di droga, labamento di placa, ilegalidad y pa combati “grens overschrijdende criminaliteit” – nos a bay Hulanda pa pidi pa bin cu “Kustwacht” pa yuda Aruba cuida nos costa. Nan no tabata kier a envolvi defensie den esaki, pero colega Rudy Croes a logra convence nan cu esaki ta un must y al final esaki a bin bira un realidad, pero cu nos mester paga parti di e gastonan. Ora a pidi nan pa Radar pa combati criminalidad atrobe nan a nenga y nos mes riba propio forsa a bin cu nan. Hopi hipocrecia den e actitud di Hulanda pa na un forma efectivo berdaderamente yuda nos combati criminalidad internacional.
Placa di Plant NV
Hulanda den tempo di e problema di e debenan di e garantianan nos a funda Plant NV pa mediante di nan fia placa pa caba di construi e hotelnan. Ora nos a trece Marriott aki y cu e hotel a bay super bon Hulanda tras di nos lomba a “bende” e hotel na New York y a keda cu e placa! Nan tabata doño legal, pero nos tabata e doño economico di e hotel, pasobra ta nos a fia placa y a paga e debe! Nos a start un bataya legal den corte pa nan debolbe nos e placa cu ta di nos y porfin nan a debolbe nos 250 miyon florin y a keda cu un parti di e placa si!
Corte Comun di Husticia
Tempo di Status Aparte pa Corsou y Sint Maarten – mirando nos tabatin hopi aña di experiencia cu corte caba – nos a propone pa pone e Corte Comun di Husticia na Aruba. Hulanda a nenga y pa motibonan “logistico” a dicidi cu e Corte ta keda Corsou. Nos a pidi conseho di Raad van State cu a duna nos razon cu e Corte por “rouleer” y bin Aruba. Ora mi a bataya cu Balkenende e no tabatin argumento valido mas y el a bisa mi cu “e no ta discuti ya cu esaki ta un decision politico”.
Consensus wet contra Statuut
Hulanda kier a bin tambe cu yen di consensus wet contra Statuut tempo di Status Aparte pa Corsou y Sint Maarten y nos a nenga esaki. Hulanda kier a pone un “pottekijker” den nos departamento di Relacion pa exterior y nos a bisa nan pa pone na otro isla cu no ta autonomo!
Exportacion di aros y sucu
Tempo di discusion di LGO ariba e exportacion pa Europa di aros cu sucu, Hulanda no tabatin argumento pakico Brussel a stop esaki y a ofrece nos “compensacion” cu logicamente nos a nenga, pasobra e ta bay pa e derecho. Nan a mata tambe e industria aki. Asina tin hopi mas caso, unda Hulanda tabata purba su cosnan. Mescos awor cu kier impone e 2 Rijkswetnan cu un gobierno colonial nobo estilo West Indische Compagnie, “CHE”.
Mi ta duna e contribucion aki pa hopi saca e mentalidad Calimero cu pasobra nos ta chikito nos no por nada, apesar cu Hulanda cu Covid 19 y e Mega debe lamentablemente a haya nos “medio en la calle” sin sufiente placa y pata pata di debe y mas debe!
Dios ilumina nos hendenan pa scapa locual nos a lucha asina tanto pe y cu ta ser poni na su prueba di nos derecho di existencia. Un contribucion personal pa bo tambe corda con cos a bay. Purba Hulanda ta keda purba te ora haya nos tur ta den un linia directo bao di Den Haag!