Home Local Prome siman di les na EPI a cuminsa den bon forma 

Prome siman di les na EPI a cuminsa den bon forma 

SHARE

 

ORANJESTAD-  Lesnan ta bayendo hopi bon den e prome siman di scol y e studiantenan ta bishitando campus di EPI siguiendo tur protocol estricto.

 

Preparacion

EPI a cuminsa cu su preparacion pa habri e aña escolar aki desde 12 di augustus caminda cu, entre otro, e studiantenan di e prome aña a pasa den e proceso di yena nan “Intake Formulier” digital na nos Open Leer Centrum a base di afspraak. Entrante 20 di augustus tur mentor a cuminsa cu e proceso di tuma contacto cu e studiantenan di e prome aña pa asina dialoga riba kico nan por spera durante nan estudio na EPI y tambe pa sigura cu e parti administrativo ta keda finalisa. Esaki a tuma luga tanto riba nos campus como online. Como cu a wordo anuncia cu scolnan ta keda cera te cu 3 di september, EPI a cuminsa draai su procesonan di enseñansa online temporalmente, pero a sigui prepara pa e modelo Hibrido cu a cuminsa wordo poni den practica asina cu scolnan a habri bek. Tambe EPI a implementa tur protocol pa cu COVID-19 di un forma estricto pa asina garantisa seguridad di tur alumno y personal. 

 

Modelo Hibrido

Pa e aña escolar 2020-2021 EPI a adapta su modelo di enseñansa pa uno Hibrido. Esaki ta consisti di e lesnan riba campus como tambe cu e studiantenan ta sigui riba distancia y online. EPI ta ofrece Beroepsonderwijs y den e proceso di cumpli cu e competencia di cada programa y mantene calidad di enseñansa, ta exigi pa tin e “proeve van bekwaamheid” cu por wordo haci primordialmente den un forma practico y “face-to-face”. Por ehempel, un studiante den e programa di Verpleging ta haya lesnan online pa siña e teoria di con pa duna un patiënt un inyeccion y ta haci varios simulacion online tambe pa mira si e ta compronde e material. Sinembargo, na final e studiante mester bin campus den un les di practica y demostra esaki.

 

Continuacion

Nos ta den e prome dianan y ta di remarca cu tur cos ta canando bon y cu e maneho di e protocolnan tambe ta bayendo den un bon forma. Nos ta contento di por bisa cu danki na e esfuerso di docente y personal nos no mester a cera scol na ningun momento y para nos procesonan di enseñansa cu ta sigui draai manera planifica.

EPI kier sigui stimula cada studiante pa keda den contacto cu nan mentor y nan unit pa asina mantene nan mes altanto di tur e procesonan di enseñansa y pa duna tur di nan mes pa haci e aña escolar aki uno exitoso.