Sabana Liber/ Papilon – Diadomingo atardi den area di Santa Cruz por a scucha masha hopi sirena.
Tanto di polis y ambulance.
Tur esaki tawata despues cu varios yamada a cuminsa drenta di un accidente di trafico serio na crusada di Sabana Grandi cu Papilon.
Un zonido fuerte ta wordo scucha algo pasa di 4’or, momento cu un accidente frontal a sosode ariba e caminda di Sabana Grandi.
Na yegada di polis nan a topa cu un Nissan March y un Hyundai Santa Fe. E Hyundai Santa Fe tawata hinca den e mondi parti zuid di caminda, mientras e March a keda memey di caminda.
Den e March tawata tin tres hoben, cual un di nan a bay den shock. Segun esnan cu a yega prome esta habitantenan, e hoben aki lo tawata sinta patras y door di e impacto a bula bin dilanti cu tur consecuencia.
Segun testigonan e hoben no tawata comunica mas y tawata haci hopi straño, posiblemente golpi fuerte paden of na cabes.
Na yegada di ambulancenan mesora nan a atende cu dos di e ocupantenan di e March pues nan tawata seriamente herida.
Un di nan por a wordo mira ta cana rond cu algun rasca, mientras cu ambulance a sali direccion Hospital cu su dos amigonan.
Den e Santa Fe tawata tin dos dama, di cual uno a herida su pia drechi por a mira esaki tawata sangra.
Na a sitio segun version di e dama chauffeur di e Santa Fe, nan lo tawata saliendo for di e caminda tera momento cu e Nissan March tawata biniendo for di pariba cu velocidad hopi halto.
Na e sitio un habitante a conta cu no a scucha ningun brake, pues solamente un zonido masha duro mes.
A informa algun oficial halto pa presenta na e sitio y tambe BFTO(departamento tecnico) pa saca potret di diferente amgulo.
Departamento di trafico a cuminsa cu nan investigacion tratando di haya mas informacion posibel for di habitantenan, por ehempel si nan tin camara di siguridad cu por a capta algo.
