Home Local Plataforma Hobennan Profesional (PHP) – Tienda di Ley: Con e mucha cu...

Plataforma Hobennan Profesional (PHP) – Tienda di Ley: Con e mucha cu nacionalidad stranhero por bira Hulandes? (Parti II)

SHARE

Den e articulo anterior nos a menciona algun forma con un menor di edad cu nacionalidad stranhero por haya nacionalidad Hulandes. Den e Segundo parti aki nos lo pone enfasis riba e aspecto con e mucha pa medio di naturalisacion ta haya e nacionalidad Hulandes.

Art. 11 RWN ta menciona e.o. lo siguiente:
1) E stranhero menor di edad cu ta yiu di un mayor cu ta bai haya e nacionalidad Hulandes ta comparti esaki cu su yiu den caso cu e mayor a pidi pa esaki na momento di haci su peticion y esaki ta ser refleha den e decision final;
2) Un peticion di un mayor pa comparti e nacionalidad Hulandes cu nan yiu menor di 16 aña ta wordo otorga, den caso cu desde e momento cu e peticion a wordo entrega, e mucha ta biba na Aruba, tin admision permanente y residencia principal aki na Aruba;
3) Den caso cu e mucha tin 16 aña caba y e mayor ta desea di comparti e nacionalidad Hulandes cu su yiu, e yiu mester tin por lo menos 3 aña sin interupcion algun, acceso pa tempo indefini y residencia principal na Aruba, prome cu e peticion a wordo entrega. E nacionalidad Hulandes lo wordo otorga solamente si e mucha ta di acuerdo cu esaki y ta dispuesto di haci un declaracion di conexion (verbondenheid);

Inciso 5 di e mesun articulo aki ta menciona cu e stranhero menor di edad, cu ta yiu di un mayor cu si a haya e nacionalidad Hulandes a traves di opcion y esaki no a wordo comparti cu e yiu door cu na momento cu e decision final a sali, e yiu ya caba tabata mayor di edad, toch por haya e nacionalidad Hulandes den caso cu:

a. E yiu, prome cu el a cumpli mayor di edad, tabata tin por lo menos 3 aña sin interupcion algun, acceso pa tempo indefini y residencia principal na Aruba, prome cu e peticion a wordo entrega;
b. E nacionalidad Hulandes lo wordo otorga solamente si e persona ta di acuerdo cu esaki y ta dispuesto di haci un declaracion di conexion (verbondenheid);
c. No tin motibo algun pa nenga e peticion aki.

Un biaha mas nos kier recorda cu den e articulo aki nos ta menciona algun scenario cu kizas lo ta esunnan mas interesante pa esnan na Aruba. Pa un lista no limitativo cual ta contene tur e categorianan nos ta referi na articulo 3, 4, 6, 10 y 11 RWN den su totalidad.

Tienda di Ley a wordo forma door di un grupo di studiantenan di ley y tambe huristanan cu pa dos aña caba ta brindando asistencia huridico na nos comunidad di Aruba. Durante e existencia di Tienda di Ley nos a publica diferente articulonan huridico. Nos a trata diferente topiconan di nos Codigo Civil, Ley Constitucional, pero tambe Codigo Penal, Ley Administrativo y Ley di Labor. Nos meta no ta pa solamente brinda asistencia huridico na nos comunidad, sino tambe informa nos pueblo y comunidad di nan derechonan. Cada ciudadano di Reino Hulandes ta suppose di conoce e leynan, pero hopi biaha pa falta di transparencia esaki no ta sosode. E hecho cu nos leynan mayoria biaha ta dificil pa compronde tambe ta hunga un rol. Pa e motibo aki nos ta purba di hinca e articulonan mas simpel cu nos por den otro na Papiamento, pero no tur biaha tin palabranan huridico exacto cu por wordo uza.

Ta spera cu por a informa e lector un poco tocante e topico aki. Si bo persona tin pregunta, algun sugerencia pa un proximo topico di ley of ta desea asistencia huridico por tuma contacto cu nos via nos facebook page: Plataforma Hobennan Profesional of nos e-mail: plataformahobennanprofesional@gmail.com.

Scirbi pa studiantenan di ley:
Gerick Croes LL.B, B.Ec
Minorca Martis LL.B