Despues cu nos por a tuma nota di e contestanan di Secretario di Estado Knops, y reaccion aki na Aruba di varios instancianan, nos por bisa cu tur esaki lo duna nos Prome Minister e ultimo rosea, pa e bin bisa cu nos lo tin cu firma “bij het kruisje” basa riba overmacht.
Prome Minister ta cu un tour di campaña di indoctrinacion completo, pa convence pueblo cu “Aruba no por paga mas”, y cu “placa a caba”. Den esaki e ta wordo sosteni grandemente pa gremionan comercial y tambe sindical. Nos por a mira con tanto sindicatonan FTA y STA a pidi minister firma e acuerdo cu Hulanda pasobra no por permiti pa Aruba muri hamber.
Cu mayoria di gremio comercial, sea cu nan tabata contra e lucha caba prome cu realisaicion di nos Status Aparte, of un grupo grandi cu a bin Aruba durante e bonanza y nan no conoce kico ta e lucha cu nos Arubianonan a hiba prome 1986, y awor ta sinti nan bida lucrativo menaza, ta fulmina contra e gremio politico awor cu “baca lo ta hogando” y exigiendo pa gobierno firma pa nos haya e ayudo financiero di Hulanda. Un ayudo cu por cierto nos tin di paga bek. E gremio comercial, na unda cu un gran parti sea a abusa di fase of di e loonsubsidie, pa por keda cubri nan gastonan.
Tur esaki ta pone nos di UPP corda riba e palabranan di nos lider inmortal, Betico Croes, esta cu “Si mi cay na caminda, gara e bandera y sigui cu e lucha” of “Dia cu mishi cu e klompi diamante, esta Status Aparte, esaki nifica guera”. Palabranan di un homber balente y cu a inspira hopi aki na Aruba. Un lucha di emancipacion, cu ta igual cu e lucha di e clase trahador, lucha di e ser humano pa igualdad, lucha di hende muhernan, lucha di esnan cu ta wordo oprimi den mundo, etc.
Pa UPP ta straño mira con awe sindicatonan FTA y STA p.e., pero tambe SPA y SIMAR, kier mira gobierno firma pa caba, mientras e condicionnan cu tin riba mesa ta ensera, e.o. flexibilisacion di e leynan laboral, flexibilisacion di mercado laboral, flexibilisacion di nos reglanan di LTU. Tur esaki pa competi cu derecho y cuponan di nos propio trahadornan Arubiano.
Un berguensa pa mira con e gremio sindical ta pusha pa entega nos autonomia, mientras cu e tipo di luchanan aki ta luchanan universal contra di opresor- y abusadornan den un bachi colonial nobo.
UPP cu hopi jaluzi of zeloos, ta mira con na Corsou si, sindicatonan ta para pa derecho di yiu di Corsou y di nan pais. E derecho di e pueblo di Corsou, ora cu nan a demostra nan malcontento den direccion di Secretario di Estado Knops durante su bishita, cu mas tempran a bay hunga e bon samaritano na Cruz Cora di Corsou.
Nos por a scucha sindicalisatanan, cu tambe tin problema cu e gobierno di Corsou pa nan forma di goberna, pero nan a manda un respondi cla y raspa pa Hulanda, “cu bo no ta mishi cu autonomia di pais Corsou”. Mientras sindicato ta bisa cu nan lo bay te na ultimo, incluso si esey nifica nan morto, aki na Aruba, tin sindicatonan cu no kier muri di hamber, y ta roga Prome Minister pa firma pa caba.
E mesun sindicatonan, cu durante 8 aña largo a “wine & dine” cu ex Prome Minister Eman y ningun momento no a para pa loke ta e abuso y e endeudamento pisa cu el a hinca nos pueblo aden, awor kier pa Aruba perde su autonomia.
Pa colmo e reunion di Parlamento pa trata retiro di un minister, a para bira un reunion cu ta un berguenza, y cu tambe ta sigui contribui na con politiek Den Haag ta sigui wak nos. Un berguensa total. Bou di circumstancianan asina, UPP ta kere cu nos politiconan den Parlamento, no tin un nocion di unda nos ta para. Nan no tin un nocion cu lo por tin solucion pa loke nos ta pasando. E wega di sigui politisa e situacion mester caba. Dia 24 di juli UPP a manda pa full Parlamento un documento pa institui un Dialogo Nacional y despues via di un Compromiso Nacional nos yega na un Zakenkabinet/Takenkabinet, pa asina bay atende cu Hulanda. Pero tin tempo pa politikeria y purba na baha un minister, pero no bay over na asuntonan mas importante pa pais Aruba.
Partido UPP
Booshi Wever
3 september 2020