ORANJESTAD – Den Augustus, e di dos luna di operacion desde lockdown, un total di 21,868 Revenue Generating Passengers (RGP) a biaha for di Aeropuerto Internacional Reina Beatrix (AUA Airport) pa varios mercado. Esaki tabata 10,692 mas cu e cantidad di Juli 2020. Den Augustus 17,546 pasahero a biaha pa Merca, 3,700 pa Europa, 202 pa Canada y 386 pa Antiyas Hulandes (34 pasahero a sali tambe pa Latino America riba un buelo di repatriacion). E cifranan pa Augustus 2020 ta 1.8% menos di loke a wordo premira pa e luna aki y compara cu 2019 AUA Airport a mira un recuperacion di 19%.
Un average di load factor (LF) (cantidad di asiento total abordo di un avion ora e sali for di AUA Airport) pa e mercado Mericano di 49% a keda raporta durante e periodo di 1 pa 31 di Augustus, 2020. E LF pa ful e luna di Augustus pa e mercadonan Europeo, Canades y Antiyas Hulandes tabata respectivamente 73%, 36% y 68%. E average di LF pa Augustus 2019 den e mercadonan aki tabata 94% (Merca), 93% (Europa), 95% (Canada) y 67% (Antiyas Hulandes).
Durante e luna di Augustus, AUA Airport a ricibi un average di 9 buelo pa dia, esaki a baha compara cu e average di 35 buelo diario pa e mesun luna di anja pasa. Pa September 2020 AUA Airport ta premira cu lo procesa aproximadamente 23,000 pasahero cu lo sali for di AUA Airport. E estimacion aki lo wordo probablemente afecta negativamente door di e restriccionnan di biahe cu tin pa por ehempel e paisnan Europeo, Hulanda, Antiyas Hulandes y Canada. TUI a cancela tur operacion pa September y e aerolineanan Canades a move nan operacionnan pa cuminsa bula atrobe pa Oktober di e anja aki. E hecho cu e fronteranan no a habri ainda pa Latino y Centro America manera a wordo premira tambe lo tin su efecto riba e cifranan cu a wordo pronostica. Un recuperacion di aproximadamente 20% di AUA Airport su trafico cu a wordo procesa den September 2019 ta wordo spera pa alcansa como resultado.
“E cifranan di trafico ainda ta abou y leu for di e cantidadnan prome cu covid-19, pero e hecho cu a casi yega e cifranan pronostica pa Augustus ta un otro testamento pa e cooperashon extenso cu nos tin cu nos stakeholdernan, specialmente nos aerolineanan partner, pa asina por duna e mihor pronosticonan posibel den e temponan dificial y insigur cu nos ta pasando aden. Nos lo sigui cu nos esfuersonan y keda optimista, cu e speransa cu e cifranan di trafico aereo lo aumenta mas liher di loke ta wordo spera. Nos lo sigui brinda tur informacion relevante y necesario na nos partnernan clave cu mester tuma decisionnan importante pa asina por planifica mihor pa nos isla” asina CCO di AAA Sra. Barbara Brown a bisa.