Home » Castigo pisa exigi pa homber cu tabata bende droga den Pos Chiquito

Castigo pisa exigi pa homber cu tabata bende droga den Pos Chiquito

by Admin
0 comment 66 views

ORANJESTAD – Awe mainta Corte den Promer Instancia a trata e caso penal cu Ministerio Publico a cuminsa contra e hombernan Arubiano J.V. y P.C. Ambos ta wordo acusa di bendemento di droga. Informacion cu Aruba Native ta dispone di dje, por a compronde cu Fiscal a exigi 5 aña pa J.V. y 1 aña y 6 luna pa P.C. Tratamento di e caso a bay via video conference door di e situacion di Corona Virus.

Fiscal ta acusa J.V. y P.C. di bendemento di marihuana y cocaina y posecion di esakinan. Fiscal a bisa cu ta sospecha J.V. di tabata bende entre 2012 y 11 Februari 2020, P.C. entre 2018 te cu 11 Februari 2020.

Hues a mustra cu via tiplijn a haya informacion cu na un apartamento na Pos Chiquito tin bendemento di droga. Polis a bay observa y dia 11 Februari 2020 a tene accion. A detene esnan cu tabata bay cumpra droga na e apartamento. Un total di 15 persona a keda deteni durante dia. E mesun dia a haci razia na e apartamento caminda a haya 127 florin larga riba un mesa y un buki cu informacionnan tocante bendemento. J.V. tabata presente y Polis a deten’e. E tabatin 2370 florin den su saco di carson. En total a confisca 4 saco cu marihuana cu a pisa 34,7 gram, 10 saco cu cocaina y 2 saco di piedra cu a pisa 144 gram y XTC.

Hues a puntra J.V. si ta berdad e tabata bende droga y kico P.C. tin di haci cu esaki. J.V. a admiti di a bende. El a bisa cu e tabata sera na 2012 pa atraco y ora el a sali di KIA, el a busca un boto pa pisca. Ora e boto a daña na 2016, el a cuminsa bende. El a bisa cu P.C. tabata bay haci cura di cas limpi. El a splica cu P.C. ta un adicto y tabata su bisiña. Hues a mustra cu na Polis, J.V. a bisa otro cos. Hues ta mustra cu J.V. a bisa Polis cu e tabata bende droga den Rancho y na 2012 el a cay sera pa atraco. El a sali na 2014 y despues na 2016 el a cuminsa bende. E tabata huur un apartamento na Pos Chiquito pa bende droga pasobra su señora no kier tin nada di haci cu droga. El a bisa cu P.C. tabata yud’e bende droga. El a bisa cu e tabata duna P.C. piedra y 15 florin pa dia pa e por come. El a bisa cu e no ta confia P.C. pa bende ora e no tey. Hues a mustra cu P.C. mes a declara na Polis cu e ta yuda J.V. bende y haci lugar limpi y cu e tabata haya piedra como pago. E tabata huur apartamento pa 6 luna. Hues a lesa declaracion di testigonan cu ta mustra cu nan tabata cumpra for di J.V. y cu P.C. ta yuda J.V. bende. Hues a remarca cu J.V. ta bisa cu e no a forza ningun hende cumpra pero loke e ta haci ta trece hopi intrankilidad den comunidad.

Fiscal a bisa cu e ta haya legalmente proba cu J.V. y P.C. tabata bende. El a mustra cu J.V. a admiti cu desde 2012, el a cuminsa bende droga den Rancho. E mesun aña el a cay sera pa atraco. Despues cu el a Sali for KIA, el a bende pisca y ora e boto a daña, el a cuminsa bende na 2016 te 2020. Fiscal a conclui cu pa 5 aña J.V. tabata bende droga. E ta haya cu P.C. tabata bende pa J.V. A base di declaracion di testigonan, por conclui cu P.C. tabata bende pa un periodo di 1 aña y 6 luna.

El a exigi 5 aña di prison pa J.V. Pa loke ta P.C., Fiscal ta haya cu e tabata un trahador di J.V. y den un periodo mas cortico. Fiscal a exigi 1 aña y 6 luna di prison pa P.C. El a exigi pa e droga confisca wordo destrui y e otro articulonan cu tabata usa pa droga lo mester keda confisca. E placanan cu a keda confisca lo mester keda confisca.

Abogado mr. Illes a bisa cu den e caso aki mester determina ki tempo tabatin bendemento di droga. El a mustra cu Fiscal mes no ta bay tras di e acusacion cu desde 2012 J.V. a cuminsa bende. Na opinion di mr. Illes, si mira declaracion di testigonan, nan ta papia di 1 aña y mey y maximo 2 aña. Pues por conclui 2 aña. E abogado a bisa Hues cu ta J.V. mes ta incrimina su mes cu ta desde 2016 el a cuminsa bende, pero no tin ningun testigo cu ta confirma esaki. Esaki ta mustra cu mester conclui cu ta na 2018 el a cuminsa bende. P.C. tabata yuda J.V. durante cu J.V. a biba na Pos Chikito cu ta un periodo di 6 luna. Esaki ta conclui cu e periodo di bende ta menos cu Fiscal a pone y mester duna menos castigo.

Hues a bisa cu dia 25 September 2020, e lo dicta sentencia.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio