Home Local Bao Preshon

Bao Preshon

SHARE

Pa 20 aña caba e muchanan y hobennan di Aruba ta tuma contacto cu Fundacion Telefon pa Hubentud Aruba tur dia pa asina expresa nan mes. Den un situacion cu ta duna nan miedo, cu pone nan rabia pa algo, si nan ta tristo of kier expresa nan felicidad, tur dia nos muchanan y hobennan ta den contacto cu Telefon pa Hubentud Aruba via telefon, email, chat, website, lectura of proyecto. Esaki ta haci cu Fundacion Telefon pa Hubentud Aruba tin un bon bista di kico tur ta tumando luga cu e mucha y hoben di Aruba.

Diabierna 13 di maart 2020. Ariba e dia aki Aruba a conoce su dos prome caso positivo di Covid-19. Desde e dia aki hopi cos a cambia riba Aruba. Pensa un rato bek na unda bo persona tawata na momento cu bo a scucha e noticia aki. Kico bo a pensa ora cu bo a scucha e noticia aki? Juist! E mucha y e hoben a pensa mesun cos. E pandemia di Covid-19 no tawata algo nobo solamente pa e adulto, pero tambe pa e mucha y hoben.

Desde e dia aki e scolnan na Aruba a cera y e muchanan y hobennan a bay cas. Esaki a resulta den un preocupacion grandi bao di profesionalnan local. Literatura y experiencia local y internacional ta mustra cu durante un crisis e prioridadnan di e adulto ta cambia y nan ta bai den un estado di sobrevivencia, stress lo presenta y lo por traduci su mes den comportacion cu no necesariamente e adulto tawata desea y e mucha/hoben cu ya caba tawata pasando den un forma di abuso (fisico, verbal, emocional of sexual), lo pasa mas momentonan bao di e mesun dak cu e posibel agresor. Nos isla ruman St. Maarten a biba hopi den un situacion similar na aña 2017 durante y despues di horcan Irma.

Motibonan ariba menciona tawata suficiente pa Fundacion Telefon pa Hubentud Aruba keda duna asistencia na nos muchanan y hobennan. Hustamente den tempo di crisis, na momento cu organisacionnan gubernamental a para algun servicio, un organisacion no-gubernamental mester tey.
Esaki ta e motibo principal pa existencia di un organisacion no-gobernamental. Banda di keda brinda e asistencia na nos muchanan y hobennan via telefon, email, chat y website, Fundacion Telefon pa Hubentud Aruba tawatatin hopi momento di intercambio di informacion cu partnernan local y internacional. Cu nos partnernan internacional manera UNICEF Nederland y Child Helpline International tawatatin hopi momento di intercambio di informacion. Cu nos partnernan nos a compromete di tey pa nos muchanan y hobenan di Aruba.

Si bo haci bo mes e pregunta di kico ta un cas pa bo persona, mi ta kere cu e palabranan: siguridad, trankilidad, un hogar caminda bo por expresa bo mes y ta bo mes, lo pasa den bo mente. Lastimamente pa algun di nos muchanan y hobennan na Aruba esaki no ta e realidad. Pa algun di nos muchanan y hobennan, hustamente e scol cu actualmente ta cera ta nan “safe place”. Di e 52 siman cu un aña tin, nos muchanan y hobennan ya caba tin 16 siman sin ta bao supervision di nos instancianan, cu normalmente sa duna nan asistencia personal. Futuro lo mustra nos ki efecto esaki lo por tin riba e mucha / hoben.

E efectonan cu si nos por wak caba ta cu politica ta bao di preshon, economia ta bao di preshon, salud ta bao di preshon, enseñansa ta bao di preshon, famianan ta bao di preshon y nos muchanan y hobennan ta bao di preshon. Na prome instante despues di 13 di maart nos a saca for di nan contacto cu Fundacion Telefon pa Hubentud Aruba cu nos muchanan y hobennan tawata tin hopi problema cu nan salud mental. Stress, ansiedad, panico, ferfelamento, situacion na cas tawata domina e motibo pa contacto cu Fundacion Telefon pa Hubentud Aruba. Lastimamente tendencia di comete suicidio tawata un di e temanan cu a resalta na e momentonan ey.

Tur aña entre 1000 y 3000 mucha y hoben ta tuma contacto cu Fundacion Telefon pa Hubentud Aruba via telefon, email, chat y website. Di januari te cu juli 2020 ya caba Fundacion Telefon pa Hubentud Aruba a surpasa 1000 contacto cu nos muchanan y hobennan di Aruba via telefon, email, chat y website.

Ariba 18 di mei 2020 scolnan por a habri bek di acuerdo cu e decision di nos gobierno. Fundacion Telefon pa Hubentud Aruba tawata sa cu e muchanan no por djis yega start sin tin un momento pa nan comparti nan experiencia cu e Pandemia di Covid-19. Esey ta e motibo cu a prepara un workshop pa asina aki e muchanan y e hobennan por a comparti nan experiencia cu e Pandemia di Covid-19. Desde 18 di mei te cu 10 juli Fundacion Telefon pa Hubentud Aruba a duna 101 workshop y a scucha 1946 mucha y 178 profesional pa medio di e workshop ‘E normal nobo?!’. Durante e workshop e muchanan y hobennan por a conta nan experiencia den e temporada, e medidanan tuma y nan expectativa pa cu futuro. Tambe nan por a conta con nan a experiencia e ‘home schooling’. Durante un workshop cu hobennan di Parlamento Hubenil, Heart Centered Leadership Foundation, Interact y e Jongerenraad di Fundacion Telefon pa Hubentud Aruba por a scucha e experiencia di e hobennan cu e Pandemia di Covid-19. E Jongerenraad di Fundacion Telefon pa Hubentud Aruba a expresa nan inkietud mas di un biaha durante reunionnan cu nan.

‘CITACION DI HOBENNAN DURANTE E WORKSHOP:‘MI ERVARING CU HOME SCHOOLING TAWATA HOPI MALO. SCOLNAN DI ARUBA NO A SA LIDIA CU ESAKI. NAN NO TA DUNANDO E NA UN MANERA CU HOME SCHOOLING TA SER DUNA NA OTRO PAISNAN. NAN A DJIS PLAK E ROOSTER ANTO DUNE ONLINE. ASINA HOME SCHOOLING NO TA BAI’. ‘MI LO KIER A CLARIFICA CU TIN UN DIFERENCIA GRANDI ENTRE HOME SCHOOLING Y CRISIS SCHOOLING. HOME SCHOOLING AMI TA DICIDI PA TA HOME SCHOOLED, PERO CRISIS SCHOOLING NO TAWATA UN DECISION. TAMBE TIN UN VERSCHIL ENTRE E CURRICULUM DI HOME SCHOOLING CU TA PRE-PLANNED Y PREPARA CABA CU DOCENTENAN EXPERIENCIA DEN SCOL ONLINE. PERO CRISIS SCHOOLING TAWATA UN BRAND NEW THING CU MI POR A COMPRENDE CU HASTA PA E DOCENTE Y STUDIANTE TAWATA UN EXPERIENCIA NOBO’.

DI E 1946 MUCHANAN Y HOBENAN SCUCHA, ROND DI 1800 TAWATA CONTENTO DI TEY BEK NA SCOL SERCA NAN AMIGONAN, AMIGANAN Y NAN DOCENTE. NAN A EXPERIENCIA E TEMPORADA RICIBIENDO EDUCACION NA CAS COMO UN TEMPORADA DI HOPI STRESS Y PRESHON DI ENSEÑANSA. MAYORIA DI E HOBENNAN CU A PARTICIPA NA E WORKSHOP A EXPRESA DI KIER SIGUI BAI SCOL. Y SI ACASO ONLINE SCHOOLING BIRA REALIDAD NA ARUBA, NAN TA SPERA CU LO TIN DIANAN CU NAN LO MESTER BISHITA SCOL. E HOBEN TERMINANDO SU EDUCACION SECUNDARIO OF ESUN NA UNIVERSIDAD CU TAWATA TIN UN PLAN PA SEA SIGUI ENSEÑANSA OF BAY TRAHA, TIN AWOR AKI HOPI DUDA. ‘MI TA CABANDO DEN E SECTOR DI SOCIAL WORK, Y MI SA CABA CU NO TA BAI TIN TRABAO PAMI’ (HOBEN DURANTE WORKSHOP). DUDA TA PRESENTE DEN E PLAN DI E HOBEN.

No solamente educacion durante e temporada tawata un preshon enorme. E echo cu e muchanan y hobennan no por a practica nan deporte y encontra cu nan amistadnan a causa un preshon grandi riba nan bida social. Como resultado di esaki kisas, na momento cu nos isla a yega bek na 0 caso positivo y cu e hoben a sinti su mes sigur atrobe, e la bai encontra cu su amistadnan bek.

Fundacion Telefon pa Hubentud Aruba sa cu na momento cu dicidi di habri scolnan bek mester tene cuenta cu tur actor. Mester wak pa e salud di e docentenan, otro personalnan di scol y nan famia y tambe esun di e muchanan y hobennan y nan famia. Pero tambe mester corda ariba e preshon cu nos muchanan y hobennan ta encontrando. Mester corda tambe cu pa algun di nos muchanan y hobennan scol ta e safe place y cu ya caba nan tin 16 siman di e aña 2020 sin supervision di nos instancianan. Tambe ta bon pa tene na cuenta cu contacto humano ta casi mesun esencial cu come y bebe algo tur dia. Pa un meta ta sostenibel, esaki mester wordo carga door di muchanan y hobennan tambe. No por sigui pone normanan pa nos muchanan y hobennan bay biba sin involucra nan aden. Esey lo haci cu e meta no lo ta sostenibel. Scucha e mucha/ hoben !