Home » Minister Evelyn Wever-Croes: PAIS ARUBA TA APROBA INICIO DI IMPLEMENTACION DI MASTERPLAN ‘REPOSICIONANDO E RUMBO DI NOS PAIS’

Minister Evelyn Wever-Croes: PAIS ARUBA TA APROBA INICIO DI IMPLEMENTACION DI MASTERPLAN ‘REPOSICIONANDO E RUMBO DI NOS PAIS’

by Admin
0 comment 71 views

Oranjestad – Den Conseho di Minister di dia 1 di september 2020 a keda aproba locual ta forma e inicio di e proceso di implementacion di e masterplan ‘Reposicionando e Rumbo di nos pais’. Un masterplan cu a wordo traha danki na e esfuerso incansabel di mas di 125 profesional di sector publico como tambe sector priva, cu durante mas di 175 sesion a duna nan conocemento y experticio pa asina crea, den temporada cu nos pais ta enfrentado reto grandi, un plan pa un futuro resiliente pa Aruba.

Importante pa indica ta cu e proceso di implementacion ta uno dinamico y continuo. Asina por bisa cu pais Aruba ta procesando varios comentario, remarca y recomendacion ricibi di diferente instancia publico y priva. Adicionalmente lo ta organisando un sesion virtual cu esnan cu a participa na e proceso riba 10 di september 2020.

Den un epoca unda cu situacionnan ta cambia den forma acelera, un acercamento flexibel y pragmatico ta wordo considera esencial. Por indica cu hustamente e proceso di implementacion en cuestion ta enfoca riba 5 asina yama proyecto di aceleracion unda cu a scoge e proyectonan aki a base di nan impacto positivo, sosten y urgencia di implementacion manera indica door di varios actor.

E 5 proyectonan ta: (1) reforma di ley laboral y mercado laboral, (2) eliminacion di asina yama ‘red-tape, (3) reforma fiscal, (4) implementacion di trayecto di e-government, I.D digital y un plataforma digital sigur pa intercambia ‘data’ y (5) reforsa capacidad legislativo y innovacion den regulacion.

Asina a inicia e proceso di crea un Aruba resiliente, reposicionando e rumbo di nos pais. Aruba ta enfrentado reto cu lo wordo transforma den oportunidad.
Prome Minister Evelyn Wever-Croes a expresa: “Mi tin tur confiansa cu hunto nos lo logra nos metanan y nos lo sigui informa comunidad tocante e progreso di e trayecto aki”.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio