Den entrevista cu parlamentario Arthur Dowers diaranson mainta a menciona e presencia di Minister Andin Bikker den reunion como tambe locual el a papia. Segun Andin Bikker el a actua conforme ley, a menciona seguridad nacional y pesey e no por desvia, tur esaki segun Dowers ta sin sentido.
Pa cumpra algun container bieu / frustia for di sponsor politico, pone den cura pa cera hende no tin nada di haber cu seguridad nacional!
Mr. drs Arthur Dowers a conseha Bikker pa miho e bay lesa su leynan bon y asina informa su mes miho kico ta seguridad nacional, mantene di orden publico, proteccion di frontera entre otro. Esaki no tin nada di haber cu pone container bieu y no ta na bienestar di seguridad nacional. Na mes momento a menciona tambe cu Bikker despues di tur e procedura cu el a hiba, ta bisa di no sa di nada y cu ta otro persona a haci’e. Logicamente e no sa di nada, pasobra tur hende sa cu Bikker no sa di nada.
Locual cu Minister Bikker ta lubida cu e ta responsabel politicamente. E tin di compronde cu por ehempel den e proceso di warda di polis nan a conseha su persona y e no tabata sa kico e ta haciendo, ta algo cu tambe Dowers ta compronde paso ta mas cu obvio cu e no sa di nada.
Tin palabracion / maneho traha cu ta Minister di infrastructura ta esun encarga pa locual ta trata huur / edificio pa e diferente departamentonan caminda e minister tin cu duna aprobacion pero no mester ta envolucra cu e proceso di busca y demas cu el a admiti di no sa nada di esaki, e ora e mester a duna expertonan e encargo pa busca y yega na un facilidad drechi.
Bikker a bay haci su porkerianan, bay busca sponsornan atrobe, riba cabes di e minister encarga cu infrastructura, incluyendo yamadanan for di bureau di Minister di Husticia instruyendo pa tur cos yega cerca Minister di Husticia y no cerca colega di Infrastructura. Tur esaki ta situacion cu Bikker kier a purba hustifica pero no a logra. Locual Bikker a haci ta purba cuestiona e Minister cu a divulga e bagamunderianan cu a tuma luga, den reunion di parlamento y sal bay manera nada no a pasa.
Segun Dowers ta algo cu no mag di pasa den un democracia, den un parlamento y no no desvia di reglamentonan cu ta fundamental. Ta asta por premira cu si keda desvia di regla ta yega un dado momento cu un partido politico cu mayoria por bay asina leu di no yama reunion den parlamento mes mas paso mi no ta respeta niun ley / regla mas y haci locual cu nan kier.
Un apelacion ta bay un biaha mas na Presidente di parlamento pa e tene su mes na regla / na ley pasobra esey ta ehempel cu ta duna na futuro generacion cu tin cu sinta den parlamento, inculca den nan e vibranan di democracia y respet pa regla pasobra si no esey ta e final.