Home Dutch Kingdom Clifton End ta lansa ‘MORENA’ komo homenage na e muhé ‘brunette’.

Clifton End ta lansa ‘MORENA’ komo homenage na e muhé ‘brunette’.

SHARE

Willemstad – E bunitesa di e muhé ‘brunette’ ta digno di ser selebrá, i e esaki ta e kaso ku e ultimo produkshon di Clifton End titular ‘Morena’. Ku e kantika aki, Clifton ke ilustra ku e muhé ‘Morena’ por ta di koló of e tin kabei skur i por ta di diferente etnisidat i aspekto fisiko. Apesar di e periodo di karentena i distansia sosial okashona pa COVID-19, Clifton no a sinta ketu i a lansa dos ‘cover’. E promé, ‘Wat is je naam?’ na aprel ku Buleria, sigui pa ‘Girl in the Life Magazine’ di Boyz to Men durante su show ‘live’ na Mei 2020.
Morena’ a keda skirbi dor di e talentoso kantante Daniel ‘Dandan’ de Jongh i e produkshon musikal a keda realisa pa Darren Dinero i Vincent da Silva. E ‘mix & mastering’ a keda na enkargo di Vincent Doorman. A opta pa hasi algu diferente pa e videoclip, kua a keda produsi pa Clifton i Vincent da Silva, dor di ilustra riba un manera kreativo kon kolorido e ‘Morena’ ta realmente. Banda di ‘Morena’, Clifton ta plania pa saka e piesanan ‘Kandela’ i ‘Baila Conmigo’ prome ku e klousura un etapa musikal di su karera, unda ela profila ku entre otro kizomba, bachata i ritmo kombina.

Plannan grandi pa 2021

Pa oktober benidero, Clifton lo finalisa un EP di seis piesa dedika na pais Kòrsou, di kua e prome piesa ta e ‘cover’ di ‘Mi Pais’ originalmente komposita i kanta pa Ced Ride, ku a sali na 2017. E EP, tentativamente titula ‘Mi Pais’, porfin lo keda lansa fin di aña, despues di un retraso ku sirkunstansianan ront di COVID-19 a okashona. Pero tur fanatiko real di Clifton sa ku su prome amor ta musika ‘soul’, unda na inisio di su karera e tabata figura den Genesis, un kuarteto ‘a capella’ di gospel. Tambe Clifton a milita dos aña largu komo kantante prinsipal di Ebony Power na Spaña, unda e tabata kanta den un homenage di e banda Four Tops. Ora aña boltu, Clifton ta plania pa lansa algun piesa den e genero di ‘soul’, en espera di su album dedika na e genro aki.

Korda pidi pa ‘Morena’ na tur radio emisora i televishon popular di nos islanan i sigui Clifton End riba Facebook/BuzzBinProductions pa keda na altura di futuro aktividat.

Pa presentashon, mail BuzzBin Productions na Media@buzzbinproductions.com pa más informashon.

Bo por chèk ‘Morena’ riba SPOTIFY Morena