Home » Ex Prome Minister Nelson Oduber: Paga luz of nos ta yuda otro sali afo! 

Ex Prome Minister Nelson Oduber: Paga luz of nos ta yuda otro sali afo! 

by Admin
0 comment 106 views

 

 

Mi a skirbi un par di contribucion pa trata na splica pueblo con serio cos ta birando pa nos tur. E pandemia aki lo laga mundo y nos tambe den e crisis financiero mas grandi cu nos generacion aki lo pasa aden. Su efectonan ta mas grandi cu cualkier guera mundial mes pa nos tur. No tin manual ni remedi efectivo pa yuda nos sali afo. Mi a bisa cu nos por a wanta 3 te 6 luna y no mas! Ya nos a pasa e liña cora cu por lo pronto pa e aña aki no tin salida y no tin perspectiva tampoco. Fuera di e pandemia nos ta den discusion cu nos mes y pa casi 3 aña cu Hulanda cu no ta contribui na e stabilidad politico ni na e trankilidad necesario cu nos mester pa pensa bon ki pa haci cu lo por yuda. Status Aparte mester a trece claridad, seguridad y trankilidad ariba tur tereno. E situacion ta mucho polarisante den e pais aki y mucho odio y envidia entre e politiconan pa trata na probecha di e situacion, lubidando cu e gobernante por bay, pero e problemanan financiero  grandi ta bira mas grandi y lo no desaparece cu cambio di gobierno.

 

Desconfiansa y mal experiencia di pasado

Segun rapport di expertonan grandi cu nos ta e pais mas afecta pa e pandemia ya cu nos ta depende pa mas cu 80% di entradanan di turismo. No tin expectativa  tampoco pa cu esaki. Ocupacionnan di 20% den nos hotelnan lo ta devastador pa entradanan di divisas, pa e empleo y entrada pa e trahadornan, e economia y gobierno. A trata pa fia placa for di Hulanda pa yuda tanto gobierno, sector priva y e empleado. Cu esaki tambe e debenan lo sigui crece. E suma cu nos lo mester fia por yega e aña aki so ariba 1.5 biyon florin! E condicionnan di Hulanda tin nos den un situacion dificil pa haci un escogencia fundamental entre bo libertad politico, bo autonomia y e parti di bo structura estatal den bo relacion den Reino cu condicionnan sumamente fuerte y comprometedor. No tin ni argumentonan valido y convincente cu rasonamento pa e 2 Rijkswetnan. Nan ta bay demasiado leu cu nos! Con ta sali afo ta exigi habilidad di convence otro cu nos tur dos tin e mesun meta y tin cu purba confia otro mas. E issue ta desconfiansa cu tin den e  relacion cu otro. Mal experiencia di pasado di CAFT tin nos den e discusion constante sin paz mental pa pensa bon con lo por yuda otro miho y pa trata na sali afo. 

 

Efectonan multiple di e pandemia

E problemanan financiero por ta aki 2 aña menos si bin un solucion pa e pandemia, cu nos por tin menos caso cu nos por deal cu ne. E problema mas grandi cu te ainda ta ser poco papia di dje ta: cuanto negoshi ta cerando, cuanto hende lo keda sin trabao y sin entrada? Ami ta calcula cu nos ta yegando 40.000 y si no ta pa e prestamo di Hulanda cos a cay den otro hopi luna pasa caba! Si e turismo no recupera pa un ocupacion di por lo pronto mas cu 70%, tur hotel lo perde placa y mas trahador lo bay cas. E efecto multiple ta 2.5 mas grandi pa cada camber ainda si conta e reorganisacion den gobierno sigui su efectonan y bay den comercio, e empleadonan den e negoshinan cu tin di haber cu turismo, e cantidad di  hendenan sin trabao of entrada ta birando y ta cogiendo formanan espantoso. Un hende sin trabao cu yen di cos pa paga cu a caba di cera un hypotheek pa su cas, a cumpra un auto y a perde trabou ta bira desespera y depresivo. Mescos e comerciante cu tin cu paga banco y e entradanan a cay drasticamente. Mescos un gobierno cu a perde 80% di tur su entradanan. 

 

E cruzada mas grandi di nos existencia

Nos ta papia di problemanan financiero, pero e problema mental di “burn out“ ta hopi mas grandi y cu efectonan pa hopi aña despues. Di un malesa bo ta cura, pero problema mental ta un proceso hopi largo mes. Esaki tin mi hopi preocupa mescos e muchanan na cas pa basta luna caba. Nos a yega segun mi e cruzada mas grandi di nos existencia, unda mester haci escogencianan pa por keda sobrevivi y keda existi. Mucho tempo ta bay perdi na politikeria pa stroba otro, hak pia di otro. Mi a scucha parti di un bijeenkomst di nos parlamento, unda gobierno a bin splica locual desde maart tur anochi of cada pasa un dia a ser haci caba! Un perdemento di tempo valioso sin ningun sentido cu hopi preguntanan cu bo mes mester por sa e contesta si bo ta sigui e desaroyo.

 

Solidarismo, comprension y tolerancia

E momento aki pueblo mester di solidarismo y mas comprension y tolerancia pa cu otro. Si bo no kier yuda alomenos no stroba tampoco! E efecto financiero di e pandemia y su efectonan mental lo haci daño ireparabel na hopi hende den futuro. Lo por bay tin hasta exceso den nan comportacion cu hopi agresividad. Mucho hende den problemanan serio mes. Mira educacion con dificil ta pa yuda nos yiunan pa prepara nan pa un bon mañan. Un cos si, cu no ta Aruba so ta den problemanan grandi, pero den mayoria pais e cos ta birando pio. Nos den Reino Hulandes ta den un situacion di tin mas pelea cu otro cu berdad busca un salida di “retreat for a better position” cu no ta facil y tin un prijs halto pa paga. Solo cu biento cu un tiki awa di cielo so ainda ta gratis. Nos problemanan ta hopi grandi y ta rekeri seriedad y responsabilidad. Mester tin salida cu menos daño pa salba e pais aki di un debacle total ariba tereno financiero y social ya cu literalmente placa a caba. Ta keda na nos tur pa ser poni na prueba con hopi nos kier sacrifica pa salba nos pais. Ta ken y con hopi nos ta stima Aruba ainda. Critica no ta un arte, contribui cu argumento pa sali afo ta un cos grandi.

 

Esaki ta un contribucion papiando cu masha hopi hende di problemanan grandi. Un contribucion personal pa yuda forma un bon  discusion cu argumentonan sano a base di un poco experiencia di a deal hopi bes cu problema, pero nunca un asina  grandi!

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio