Home Local Veterinaire Dienst ta sigui alerta riba importacion ilegal di animal

Veterinaire Dienst ta sigui alerta riba importacion ilegal di animal

SHARE

 

ORANJESTAD, Aruba –29 augustus 2020. Riba diabierna dia 21 di augustus 2020 Guarda Costa a intercepta un boto cu hende y animal ilegal abordo.
Veterinaire dienst mesora a wordo informa manera ley ta stipula. Abordo di e boto a ser encontra bou di condicionnan hopi critico, un gay di pelea y 20 parha famia di papagaai. Algun animal a ser encontra morto caba, otronan a fayece despues di jegada y e resto no a keda otro opcion pa pone nan drumi via euthanasia pa asina nan ser alivia di nan situacion critico y penoso.

Veterinaire Dienst un biaha mas kier enfatisa cu importacion di bestia ilegal ta trece risico pa introduccion di zoonosis y/of otro malesa infeccioso na nos isla cu por causa peliger na nos fauna y nos hendenan.
Un mensahe ta bay pa comunidad, sea alerta y no bay tras di negoshi/importacion den bestia exotico pasobra e persona cu wordo atrapa lo wordo persigui penalmente.
Veterinaire Dienst ta pidi tur hende pa tene mas respet y comprencion pa bestianan exotico y no laga nan wordo saca ilegalmente for di nan habitat natural cu e consequencia cu nan lo extingui.