Den nos comunicado anterior nos a pone enfasis riba e hecho cu cierto actonan via rednan social por ta castigabel pa ley. Nos a menciona entre otro ofensa, stalking y tambe menasa. Den e edicion aki nos lo trata e di dos parti di e articulo caminda nos lo pone enfasis riba hacking, grooming, scam y provoca menor di edad na actonan obsceno (sexting).
Hacking
Hacking ta nifica cu un persona ta haya acceso na datonan di un otro persona atraves di e uzo di computer y red. Esaki por ta un delito na momento cu e acto aki sosode sin e permiso di e propietario di e datonan. Art. 2:69 di nos Codigo Penal ta stipula cu cualkier persona cu obtene acceso na un trabou automatisa (bou di un trabou automatisa por lesa : computer/smartphone/tablet) deliberadamente y ilegalmente, lo por wordo condena cu castigo di prizon pa maximo un aña of un multa di tercer categoria. Haya acceso ilegalmente ta na momento cu:
- E persona ta kibra e seguridad di e sistema pa haya acceso na informacion;
- E persona door di intervencion tecnico ta haya acceso na informacion;
- E persona ta haci uzo di señalnan falso of un codigo falso pa haya acceso na informacion;
- E persona ta aparenta di ta un hende cu tin acceso na e informacion, mientras cu esaki no ta e caso.
Articulo 1:54 di nos Codigo Penal ta stipula e suma cu ta mara na cada categoria:
Multa di tercer categoria ta un suma total di Afl. 10.000,-
Multa di cuarta categoria ta un suma total di Afl. 25.000,-
Grooming
Grooming por wordo describi como un proposicion pa conoce un persona menor di diesseis aña cu e proposito di comete actonan indecente (ontuchtige handelingen). Por lo tanto, e obhetivo principal di e depredador di reuni cu e persona menor di diesseis aña ta basa riba e hecho di comete actonan obsceno. Corte Supremo a menciona cu e delito penal di grooming ta rekeri:
- Cu e sospechoso ta propone un cita pa conoce e mucha;
- Y cu e sospechoso ta haci tur locual ta na su alcance pa e cita aki sosode
E punto central di grooming ta e reunion/cita cu e menor. Cu otro palabra, comunicacion cu un menor mediante celular of computer no ta un delito penal, incluso si e contenido di e combersacion tin un tono indecente. E acto castigabel ta surgi na momento cu e sospechoso propone e menor di conoce otro den persona y e sospechoso ta haci tur locual cu e por pa por cumpli cu e cita aki. Como por ehempel door di bai na e luga acorda, door di manda e localidad pa e menor, door di cumpra carchi di bus pa e menor of paga taxi pa e menor. E cita aki mester ta cu e intencion di comete actonan sexual y of saca potret di esaki. No ta necesario cu e actonan sexual a tuma lugar of cu a inicia esaki. Si acaso e actonan aki a tuma lugar caba, nos lo ta papiando di mas delitonan penal como por ehempel violacion.
Art. 2:207 di nos Codigo Penal ta stipula cu e persona cu mediante un celular of computer, propone un cita pa conoce un persona di cual e sa of tin e sospecha cu e otro persona no a cumpli e edad di diesseis aña, cu e simpel proposito di comete actonan indecente of tuma potretnan di un caracter sexual cu ta involucra e menor y ta haci tur loke e por pa e cita aki tuma lugar, por wordo castiga cu prizon pa maximo 3 aña of haya un multa di di cuater categoria si acaso e wordo haya culpabel.
Sexting (provoca menor di edad na actonan obsceno)
Por papia di sexting na momento cu ta manda of ricibi imagennan sexual a traves di rednan social via internet, como por ehempel publica potretnan of videonan sunu di un menor di edad riba Facebook of manda esakinan a traves di Whatsapp. Menor di edad den e caso aki ta un persona cu no a cumpli e edad di diesocho aña ainda. E termino sexting ta deriva di e palabra sexo y mensahenan di texto. Sexting ta cai bou di e categoria di pornografia di mucha y por lo tanto ta castigabel pa ley, art. 2:196 di nos Codigo Penal. Condena pa e acto penal aki ta uno di maximo cuater aña di prizon of un multa di di cuater categoria.
Scam
Awendia bendemento y cumpramento di productonan online ta algo hopi comun. Sinembargo esaki por trece algun riesgo cune, como por ehempel hendenan cu ta comete fraude deliberadamente. E por pasa cu bo ta paga pa un producto, pero na final di dia bo no ta ricibi loke bo a paga pe, bo ta ricibi un producto falso of bo ta ricibi un producto kibra. Tambe bo por wordo confronta cu e hecho cu abo ta bende bo producto online, pero no ta wordo paga pa esaki. Den ambos caso ta hopi probabel cu bo ta un victima di scamming.
Art. 2:305 di nos Codigo Penal ta stipula cu na momento cu un persona tin e intencion di sali gana ora di comete actonan ilegal, door di uza un nomber falso, aparenta di ta un hende cu e no ta, haci maniobranan, convence otronan pa: entrega cierto productonan, duna cierto servicionan, duna cierto informacion, hinca bo mes den deuda of anula un deuda, por wordo castiga cu un condena di prizon di maximo 4 aña of un multa di di cuater categoria si e wordo haya culpabel di fraude/scam.
Tienda di Ley kier enfatisa cu a trata mas tanto posibel na splica e terminologianan aki den Papiamento pero no tur biaha tin palabranan huridico exacto cu por wordo uza. Ta spera cu por a informa e lector un poco tocante e topico aki. Si bo persona tin pregunta of ta desea asistencia huridico por tuma contacto cu nos via nos facebook page of nos e-mail: [email protected].
Scirbi pa studiantenan di ley:
Minorca Martis LL.B.
Gerick Croes LL.B, B.Ec