Despues di casi 3 luna cu Aruba su sistema politico y di gobernacion tabata den un sorto di impasse, nos ta bin tende awe dor di minister Bikker e “pipa di paz” lo a wordo huma na Cocolishi. Un impasse cu cuminsa riba diabierna 5 di juni pa core cu minister Lopez-Tromp, creando un crisis den gobernaciona na momento cu Aruba ta pasando den situacion di crisis y chaos di COVID-19 y presion Hulandes pa Aruba entrega su autonomia. Un tempo di 3 luna valioso memey di un crisis ca a bay perdi, na unda cu Aruba tabata den un situacion politisa di bay bin entre miembronan di partido y tambe di coalicion, cu e.o. royement di minister Lopez-Tromp di su propio partido, exigencia di su retiro como ministera, confrontacion entre e minister y su coleganan minister y parlamentarionan, reunion urgente den Parlamento pa baha e minister, mocion di desconfianza, carta di ministernan cu no kier traha cu minister Lopez Tromp y ni atende reunionnan di ministerraad, acusacionnan, spiritonan trahando na gobierno, corupcion den cuestion di tereno, intermediacion, y Dios sa kico mas. Mainta nos ta lesa cuaparentemente awor lo a sali huma di paz for di Cocolishi na Playa! Diripente nos por lesa di minister Bikker, cu e por sinta atrobe den ministerraad cu minister Lopez Tromp, pasobra su otro coleganan a indica cu nan ta dispuesto pa re-anuda e relacion di trabou y reunionnan di Ministerraad cu minister Lopez-Tromp. Diripiente minister Bikker ta realisa, despues di 3 luna, cu nos tin retonan grandi y “sin precedente” pa atende den cuadro di COVID-19 y tambe di e presion Hulandes riba nos pais.
Kico a sosode? Con e intermediacion a desaroya? Diripente minister Bikker ta wak e bienestar general y kier restaura e relacion di trabou cu colega Lopez-Tromp? Kico a pasa? Dicon diripiente e actitud aki di coleganan minister di minister Bikker? Nan a lagu’e cay pa scapa nan propio peyeho? Kico e parlamentarionan di POR ta bay haci awo?
UPP no ta yega na un otro conclusion cu e situacion ta parce uno di cu e “cacho mester ta coriendo cu su rabo pega memey su pianan”!! Tin minister of parlamentario sostenedor di e gobierno actual por sigui yama nan mes integro ainda, despues di e reunion di diaranzon? Mirando cu awor e reunion ta bay sigui diaranzon, kico nos presidente di parlamento lo bai bisa awo? Ta sigui cu un reunion y ta djis bay splica cu no tin “behoefte” pa papia pasobra a resolve e problema? Apesar cu pa UPP, scuchando minister Lopez-Tromp den su conferencia di prensa na ARASHI, cu mucho no a wordo logra. Solamente cu awor si e por continua cu su trabou segun e parlamentarionan di POR y cu minister Bikker lo atende reunionnan di ministerraad atrobe.
UPP ta kere cu particularmente e dos miembronan di parlamento di partido POR mester duna un bon splicacion, mescos tambe parlamentarionan Tjon y Ricardo Croes mester splica pakico a firma e peticion pa e reunion. Parlamentarionan Tevreden y Howell, cu siman pasa ainda tabata exigi pa haya e documentonan cu minister tin, lo no por permiti pa reunion djis bira un reunion di “geen behoefte”, pasobra supuestamente a regla cos.
Nos ta kere cu e documentonan cu lo ta existi mester bira publico na e momentonan aki. Documentonan cu ya ta “ter inzage” den Parlamento segun nos Ley di Openbaarheid van Bestuur por ta den man di e parlamentarionan pa cuminsa! Esey ta e esencia di e ley!
Pero kico a pasa pa cambio di e actitud aki? Of ta trata di un set di minister y parlamentarionan probechador y sin escrupulo, cu ta scohe of prefera pa dobla rabo, pasobra nan peyeho ta den wega?
Ta manera e sprookje ta bisa: “POPPETJE GEZIEN, KASTJE DICHT!!”
Kizas dor cu e documentonan lo por ta mucho comprometedor lo percura pa e reunion aki caba na “arroz con coco”? Pero nos ta kere cu Pueblo derecho di haya sa, no cu tin corupcion, pero con GRANDI e corupcion ta!! Es mas nos ta kere cu MiPres Croes-Wever tambe mester tey den e reunion di diaranzon pa duna cuenta di su intermediacion!
Por ultimo nos por comprende cu rumornan ta persistente, incluso for di propio seno di partido POR, lo ta den fase di descomposicion. Kico di berdad tin aki? Si algun luna pasa nos a bisa cu tin un tijdbom bou di e coalicion actual dor di e actitud di POR y e scorpion cu keto bay lo tin e coreografia den su man, awor esaki parce di ta bira mas eminente. Cuanto tempo mas e coalicion POREDmep tin?
Manera UPP a bin ta bisa for di basta tempo caba, cu e base politico di e gabinete actual ta manera shaky, y esaki lo no contribui tampoco pa pone un “mokete” pa cu Hulanda su intransigencia. Awor esaki parce ta e caso mas cu nunca, pesey tambe UPP ta kere cu ta mas cu na su lugar pa Aruba conoce un gobierno naciaonal of un zakenkabinet, cu ta carga sosten di un mayoria grandi den Parlamento. Ta di e manera aki so nos por sirbi nos pais y enfrenta Hulanda na e momentonan aki. Un eleccion lo no combini nos pais na e momentonan aki!
Partido UPP
Booshi Wever
28 augustus 2020