2 aña di prison pa hincamento riba Pasco anochi

ORANJESTAD – Awe mainta sentencia a cay den e caso penal cu Ministerio Publico a cuminsa contra e homber A.S., kende ta wordo acusa di intento di asesinato di e homber B.

Arubanative por a compronde cu Fiscal a exigi 8 aña di prison pasobra e ta haya A.S. culpable di intento di asesinato. Hues no ta haya legalmente proba intento di asesinato y a condena A.S. na 2 aña di prison.

Ta asina cu A.S., 25 December 2019, Pasco anochi, a hinca B. cu cuchiu cu consencuencia cu B. mester a keda hospitaliza.

Hues a mustra cu e hincamento na e parti ariba di curpa di B., Fiscal ta cualifica intento di asesinato pasobra Fiscal ta haya cu A.S. tabatin un plan pa intencional hinca B.

Hues no ta haya cu A.S. tabatin e plan pa hinca B. El a mustra cu a base di declaracion di e victima mes B. y otro testigonan, 25 December 2019, A.S. y B. tabata riba caya dilanti cas di e homber P. Tur dos tabata bou influencia di alcohol y droga. Testigonan a bisa cu B. tabata haci fastioso y kier a bringa. P. a tende cu tabatin discusion entre A.S. y B. El a kere cu ta normal pasobra sa sosode mas biaha y nan ta discuti cu otro y despues ta bon cu otro. Nan ta amigo di otro. A.S. lo a expresa cu si B. dal e, e lo hink’e. Na dado momento P. a scucha B. keha y ora el a Sali, el a mira B. drumi abao den un plas di sanger. Hues a sigui bisa cu testigo W. tambe a bisa cu el a scucha gritamento y ora el a sali for di cas, el a mira B. drumi den un plas di sanger.

Hues a mustra cu A.S. a bisa cu B. kier a dal’e cu un boter di rum chikito y A.S. a hink’e cu un cuchiu cu e ta usa pa corta droga.

Hues a sigui bisa cu e otro acusacion cu Fiscal a presenta ta intento di mata. Hecho ta cu a hinca B. na e parti ariba di curpa. Hues a bisa cu A.S. a bisa cu e no tabatin intension di mata. Na opinion di Hues, e raport medico ta mustra cu B. a sufri un hinca den curpa y mester a keda interna. Segun e raport medico, no mester a haci operacion y no tin ningun informacion unda preciso e hinca tabata y con hundo.

Hues ta haya cu tur e informacion aki ta mustra cu no ta aceptabel cu A.S. a usa asina hopi forma cu por a mata B. Esey ta haci cu no ta prueba cu A.S. tabatin intencion di mata B.

Hues a sigui bisa cu e ta haya proba cu A.S., door di a hinca B. na parti ariba di curpa, a purba causa herida severo na B.

Hues a mustra cu A.S. a bisa cu el a actua den defensa propio. Hues a rechaza esaki.

Hues ta haya cu A.S. a hinca B. cu cuchiu na parti ariba di curpa. Danki Dios no tabata grave.   Hues a condena A.S. na 2 aña di prison, kitando e tempo cu e ta sera den KIA. Pa loke ta e demanda di daño di parti di B. a keda rechaza. Hues ta haya cu B. no a splica suficiente pakico e ta demanda e suma cu el a pidi.