Home Local Wiki Loves Monuments Aruba ta bek!

Wiki Loves Monuments Aruba ta bek!

SHARE











E aña aki un biaha mas Stichting Monumentenfonds kier duna atencion na nos monumentonan den luna di monumento. Normalmente ta organisa diferente actividadnan pero e aña aki debi na e situacion di e crisis a opta pa organisa solamente Wiki Loves Monuments, cual ta un competencia di fotografia alabes e lo ta un actividad cu participantenan lo por haci siguiendo e reglanan di precaucion.

Wiki Loves Monuments ta un competencia internacional di fotografia organiza pa Wikimedia. Wikimedia ta e organisacion tras di Wikipedia, e encyclopedia gratis y un colaboracion global sostene pa boluntarionan.

E competencia a inicia na 2010 na Hulanda, despues a expande pa Europa y mundo henter colectando asina  informacion di 1,5 miyon monumento di 76 pais y mas di 1,7 miyon  di fotografia entrega pa mas cu 600 mil participante.

Mas di cuarenta pais rond mundo ta organisa tur aña un competencia nacional cu nan propio reglanan y eventonan pero cu un tema en comun cu ta monumentonan.

Cada competencia nacional lo nomina nan ganadornan pa participa na e competencia internacional. E fotografianan aki lo wordo husga pa un hurado internacional cu lo scohe e mihor imagennan entre tur e paisnan participante.


Herencia Cultural ta un parti importante di informacion cu Wikipedia ta collecta y comparti. Tur hende por aporta cu informacion pa medio di imagennan y of articulonan.
Un imagen ta bal mas cu mil palabra y asina aki un y tur por descubri e cultura, historia y significado scientifico di nan pais y comparti esaki cu mundo henter.

E aña aki pa di cinco biaha Stichting Monumentenfonds Aruba lo organisa un competencia nacional.
E competencia lo tuma lugar na september entre 1 cu 30 . Tin algun regla cu ta mara na e competencia manera entre otro  e portret mester ta di autoria di e participante y na momento cu upload e potret ta entrega e derecho na Wikipedia pa uso liber.

Tur persona cu kier participa na Wiki Loves Monuments mester simplemente tuma un fotografia di un monumento di Aruba y upload esaki via Wikimedia entre 1 y 30 di september. Ta hopi importante si pa e persona registra riba Wikimedia.
E participacion ta habri pa tur hende di tur edad, no mester ta un professional.
E potret no mester ta saka den e fechanan aki e por ta un potret cu ya e participante a yega di saca den pasado pero solamente por upload e pa participa entre 1 cu 30 di september.

Despues di 30 di September un hurado local di 3 persona lo evalua tur e fotografianan y scohe esun ganador.  Tambe lo nomina e mihor dies  imagennan cu lo sigui participa den e competencia internacional.

Pa tur e reglanan y informacion tocante participacion por sigui nos facebook page Stichting Monumentenfonds Aruba y nos website www.monumentenfondsaruba.com