Home Local Segun protocol di testing, ta test solamente ora tin sintoma. Dunador...

Segun protocol di testing, ta test solamente ora tin sintoma. Dunador di trabou no por exigi trahado un test negativo pa por regresa trabou.

SHARE

 

ORANJESTAD, Aruba 27 augustus 2020. Departamento di Salud Publico ta bin ta ricibi yamadanan di trahadornan informando cu nan no por regresa trabou si no tin un test di covid negativo.

Departamento di Salud Publico pa medio di e comunicado aki ta informa dunadornan di trabou cu e acto aki ta contra derecho di e trahador. Un test di covid por wordo unicamente exigi door di un dokter pa por confirma un diagnostico.

E maneho di testing pa covid-19 ta stipula cu ta test solamente ora cu tin sintoma y solamente un dokter despues di evalua e pashent ta instrui pa haci un test.

Un persona cu a recupera completo y a ricibi e autorisacion for di e departamento conserni pa sali di isolacion, por bay traha siguiendo tur medida di higiena y proteccion ya conosi.

Re-testing di e persona recupera no ta nesesario y tampoco ta tuma lugar mas unabez cu e persona recupera. Esaki ta e maneho adapta basa riba e situacion di brote cu Aruba ta confrontando. Adaptacion di e maneho ta basa riba investigacionnan y consehonan di organisacionnan di salud internacional.

Na momento cu un dunador di trabou ta exigi un test cu ta imposibel pa e trahador provee debi na e sistema cu no ta permiti, esaki ta bay contra etica di labor.

Departamento di Salud Publico conhuntamente cu Crisis Team y Gobierno di Aruba ta fiha e miho maneho posibel pa maneha e crisis di covid existente y exigiendo un test negativo di un pashent recupera no ta forma parti di e maneho existente.