Pendiente di interogacion di un testigo na Canada
ORANJESTAD — Hof di Corte Superior a bay di acuerdo cu e peticion di abogado mr. Arendsz Marchena pa scucha un testigo na Canada den e caso di su cliente Michael Gibson. Informacion cu Arubanative ta dispone di dje ta mustra cu cu aña pasa October 2019, Hues a condena Michael Gibson na 15 aña di prison pa asesinato di un Chines den un apartamento na Jaburibari.
Michael Gibson no ta contento cu e sentencia y a apela esaki. Via video conference Hof a atende e caso. E tres Huesnan tabata den un oficina di Corte na Curacao, mientras cu Gibson tabata den un oficina na KIA y Procurador General (PG) y abogado mr. Arendsz Marchena, tabata den un sala di Corte di Husticia di Aruba.
Ta asina cu abogado mr. Arendsz Marchena a pidi Hof pa scucha un testigo cu ta na Canada. E peticion aki a sosode anterior y ta asina cu Hues Comisario lo mester haci esaki caminda mester pidi asistencia di autoridad di Canada pa scucha e testigo. Te ainda esaki no a sosode y pesey e caso a bin dilanti pro forma. E tratamento di e caso ta keda pospone te ora cu autoridadnan na Canada a interoga e testigo.
Na October 2019, Hues, den su sentencia, a bisa cu e ta haya legalmente proba cu Gibson a tira mata e Chines y tabatin un arma den su poder. Hues a bisa cu e ta haya Gibson culpable di a tira mata e Chines. Hues a tuma Gibson na malo cu e forma cu a tira mata e Chines, cu ta un forma serio di asesinato. Hues a bisa cu e ta sigui Fiscal su exigencia. Hues a condena Gibson na 15 aña di prison, kitando e tempo cu e ta sera den KIA.