Parlamentario Alan Howell: “Persona cu a leak e informacion confidencial di pashentnan mester para responsabel pa su actonan”

Alan Howell, durante conferencia di prensa di Fraccion di POR a elabora riba e tema di leak di informacion personal di e personanan contagia cu Covid-19.
El a indica cu Fraccion di POR a brainstorm y purba saca un conclusion di con e lista aki cu informacion superconfidencial di nos ciudadanonan por a leak y a base di esaki a haci entrega di un serie di pregunta na e minister encarga pa por haya respuestanan cu pueblo ta boga pe mas pronto cu ta posibel.
Howell ta bisa cu “por a wak cu algun persona ta chercha esaki, pero mi ta sigur cu si ta nan informacion riba nan salud lo ta esun cu a leak, nan no lo a keda contento, pesey mes mi ta kere cu e tema aki mester wordo trata cu tur e seriedad necesario pa asina aki tur esnan cu tin Covid-19 nan nomber a wordo haci publico por sinti tambe cu pueblo en general ta rechasa loke a pasa. Esey ta e minimo respet cu nos por duna esnan cu nan nomber a wordo haci publico”.
Fraccion di POR a haci entrega di un lista di pregunta na Minister di Salubridad Publico riba e tema cu e peticion di haya e contestanan por escrito pa di e forma aki por haya claridad riba e caso serio y lamentabel aki. Si acaso e respuestanan no ta suficiente claro of falta mas splicacion, lo haci e peticion pa e mandatario acudi na Parlamento pa contesta e preguntanan personalmente.
Alan Howell a indica tambe cu por a constata cu a cuminsa tilda otro politicamente cu un of otro partido lo por ta involucra den esaki, pero fraccion di POR no lo bay den esey. Fraccion di POR kier un trato husto pa lo cual ta trata e parti hudicial.
“Nos ta contento di por a scucha cu ya caba keho a wordo entrega na Ministerio Publico. Mi ta kere ta ey ta e caminda cu nos mester bay y mi tin confiansa den nos sistema hudicial cu pronto nos lo por tin un resultado di ki dia, con y ken lo por a leak e informacionnan aki. Dios laga cu por soluciona e caso aki rapidamente. Como persona cu ta bin di Cuerpo Policial, sin desea malo pa ningun hende, mi ta kere cu e persona cu a echa baina, sea cual sea su motibo, e mester wordo castiga como debe ser”, Alan Howell a duna di conoce.