Home Politics Ex Prome Minister Nelson Oduber: “Politicamente mi ta kere cu nos ningun...

Ex Prome Minister Nelson Oduber: “Politicamente mi ta kere cu nos ningun kier perde locual hopi di nos den pasado a lucha pe”

SHARE

No tin ningun indicacion segun expertonan den medicina cu por yuda nos a corto plazo pa caba cu e pandemia di Covid19. Tin hopi experto bruha, manera un pushi den un bol di hilo. WHO tur dia ta contradeci nan mes y ta papia bruha y sin seguridad. Nan mes ta contradeci otro y ta pone nos den mas duda. Mi ta compronde cu no tin un manual medico pa Covid 19, pero a lo menos nan mester bira serio si. Si paisnan grandi a perde gran parti di nan economia y nan finansas, cu companianan grandi ta kibra of ta kitando miles di hende for di trabao y cu viahamento tanto como turista of pa metanan comercial lo cay drasticamente, ta mas cu logico – conociendo e politiconan Hulandes – cu nan primeramente ta percura pa trece bao di nos como politico duda y crea division bao di nos pueblo. Nan ta manda nan satelitenan pa trata na bruha cos tur dia, cuminsando cu e wega di tur sorto di acusacion contra politiconan a sabiendas cu e situacion ta hopi dificil y cu te na e momentonan aki nan tin e placa pa fia nos cu yen di condicion pa strangula nos pueblo.

Un pandemia devastador
Hecho ta cu nos lo keda strangula den e proximo 25 añanan no solamente cu e debe cu ya caba tabata gigantesco y Hulanda ta poniendo condicionnan cu nan unico meta ta pa trece intrankilidad y instabilidad. Nan sa cu ta yega un momento pa haci un escogencia grandi cu lo tin su efectonan peor cu 1948-1950 cu a hinca nos den e Antias di 12-8. E pandemia ta asina devastador cu su efectonan lo ser sinti pa hopi aña mas. Politicamente mi ta kere cu nos ningun cu un par di excepcion kier perde locual hopi di nos den pasado berdaderamente a lucha pe. E falta di seriedad di oposicion y su aliadonan cu weganan sushi a keda etala cu publicacion di un lista cu desde maart tabata existi y diripiente despues di un brainstorming den AVP un medio comprometi tin e lista di pashentnan cu tin e Covid 19! Algo censurabel y condenabel. Ta e cosnan aki Hulanda ta warda ariba dje pa nos cu nos bringa ariba e cosnan aki, pero e issue di gravedad mes di e situacion financiero tin hende y gremio no kier asumi responsabilidad y ta keda haci wega. Hulanda sa cu 80% di nos economia ta paralisa, cu no tin trabao, cu divisasnan no ta drenta, cu mayoria hende ta depende di gobierno su ayudo.

Escogencia politico pa nos futuro
Finansa publico y sector priva ta super delicado y nos ta colgando na un hilo. Ta yega un momento cu bo mester trata na pone bo bandera politico un banda y haci bo escogencia cual banda bo ta para. Bo ta nenga e 2 Rijkswetnan y si Hulanda no fia nos placa mas kico lo ta bo responsabilidad den esaki? Bo ta dispuesto pa lucha un tiki of bo ta cla pa probecha di e situacion cu e mentalidad di “quitate tu, para ponermo yo“? Bo tambe no ta pensa kico lo pasa cu Aruba basta abo por saca probecho politico a corto plazo, pero riba termino mediano y largo bo sa cu bo a bira un “marioneta“ di Hulanda cu un otro West Indische Compagnie“ moderno bao capa di Rijkswet, no di decada pasa, pero awor na 2020? Abo cu kier para un banda grita duro ta yega e momento pa haci escogencia politico pa nos futuro. Cual banda bo ta para y bo ta dispuesto pa uni den mesun pensamento pa salba nos di bira catibo moderno di Hulanda bao guia di 3 Hulandes a la estilo “remote control”? Nos situacion ta mucho serio y delicado pa permiti muchachada y weganan infantil. Casi rond mundo tin problema y e arte lo ta con nos lo deal cu ne y sali politicamente den nos relacion cu Hulanda menos herida cu ta posibel. Un observacion di un cu sa un tiki so!