Kiko ta love bombing?
Love bombing ta encera e practica di bombardia un hende cu atencion, amor y adoracion, por ehempel: Manda mensahenan sorpresa den su postbus di cas of plak esakinan ariba su windshield di auto, aparece diariamente cu flor na su cas, bin buske pa lunch den forma ‘sorpresa’ sin puntra si e kier of tin tempo, manda regalonan extravagante na su trabou pa tur hende por wak, mande textonan y voice message constante bisando e con special, bunita, atractivo e ta, etc.
Pero…esaki ta zona super romantico…
E idea di mensahenan y sorpresanan constante en berdad por zona super romantico, pero si nan ta bin di un persona cu recientemente bo a haci conoci cune, esaki por ta un red flag. Ta normal pa sinti un gevoel intenso den e fase inicial di un relacion, pero pa cualkier hende por sinti incomodo ora un persona cu apenas el a cuminsa date di un dia pa otro ta cuminsa impone su mes, sin duna tempo ni espacio pa conoce otro miho. Den e caso di love bombing nos no ta papiando di un entusiasmo normal na comienso di un relacion. E ta mas bien un gevoel di un rosea den bo nek. E love bomber ta demostra un atencion obsesivo y ta bezig practicamente henter dia, uzando e gestonan romantico aki como un sistema di control. E siguiente stap di e love bomber ta pa convencebo pa dedica mas y mas tempo na dje, lagando bo famia, bo amigonan y bo mesun bida un banda.
Tactica di manipulacion
Narcistanan ta particularmente conoci pa nan tacticanan di manipulacion, como tambe nan amor excesivo pa nan mes. Na comienzo, e narcista lo uza e tacticanan di atencion aki como medio pa presenta su mes como e pareha perfecto, pa gana bo confianza y afecto y ultimamente, pa convencebo cu e ta esun mas indica pa bo (lesa: pa dirigi bo bida). E lo lagabo kere cu e ta bo protector, mientras cu su unico meta ta pa hacibo completamente dependiente y obediente. E narcista ta un persona sumamente astuto, cu lo bisabo exactamente locual abo kier tende. Pues, ta importante pa pone bon atencion, no solamente na locual e ta bisa of haci sino tambe na locual e no ta bisa of ta keda sin haci na momentonan clave. Confia den bo intuicion. Asina cu bo sinti cu algo ta robes cu e persona aki, tuma esaki na serio. Principalmente, na unda abo ta sinti cu bo no por bisa ‘no’ sin sintibo culpabel, nos por papia di un relacion manipulativo y toxico, asta si ainda no tin pleito of discusion. Corda, cu e meta di e narcista cu su tactica di love bombing ta pa gana e confianza y afecto di su victima. Y e lo haci loke sea pa domina e situacion y captura e victima prome cu esaki ripara su wega.
Amor of acoso?
No tur hende cu ta afectuoso cubo y ta suspira palabranan bunita den bo horea ta un manipulador. Esey ta mas cu claro. Casonan di ‘amor a primera vista’ ta existi. Tin hende cu berdaderamente ta ‘click’ desde un principio, pero den e caso ey ambos ta confortabel cu e progreso di e relacion. Tene den mente, cu si abo ta un persona complaciente, (co-)dependiente of insigur, of bo ta pasando den momentonan dificil emocionalmente, bo ta mas vulnerabel, y den e caso aki e victima perfecto pa un narcista. Ta keda na abo pa ta atento y protege bo mes. Asina cu un persona cu bo practicamente no conoce, cuminsa hacibo sinti incomodo, imponiendo un relacion ariba bo, sofocando bo cu atencion y controlando – tambe na manera fini – unda y cu ken bo ta y kiko bo ta haciendo, bise inmediatamente, danki pa e atencion; mi ta aprecia esaki, pero mi no ta cla pa un relacion. Tene na cuenta cu un narcista ta super manipulativo, pues e lo bai drenta den su rol di victima pa purba lagabo sinti cu bo ta cruel of malagradecido. No laga bo mes wordo manipula ni forsa den un relacion cu abo no kier. Bula afo prome cu ta laat.
Desiree Swaen, Certified Relationship & Life Coach – www.ds-lovecoach.com