ORANJESTAD – Aruba Airport Authority N.V. (AAA) su “Wings of Hope” orguyosamente a haci un donacion di 217 pakete cu material di scol y 160 voucher pa uniform na Departamento di di Asunto Social (DSZ).
Como parti di AAA su proyecto pa sostene comunidad cu a inicia 1 di Juni, 2020 cu e meta pa asisti y sostene rond di 70 famia cu ta den necesidad, AAA ta sostene 217 studiante tambe door di haci un donacion di materialnan pa Back-To-School.
AAA conhuntamente cu DSZ lo yuda 217 studiante cu ta atendiendo diferente scol incluyendo kleuter, basisschool, MAVO, HAVO y EPB cu nan materialnan di scol y vouchers pa uniform. Cada studiante lo ricibi un rugtas of maletin nobo hunto cu su materialnan basico rekiri pa cada grado di scol. Adicionalmente, 160 studiante lo ricibi vouchers di uniform cu nan por usa na e compania asigna na nan.
Apesar di e efectonan di COVID19, AAA ta kere cu e ta su deber y responsabilidad pa yuda esnan cu na e momentonan aki ta den un situacion dificil y cu mas a wordo afecta door di e crisis y esaki ta inclui e muchanan tambe.
Durante e entrega di e materialnan di scol y vouchers pa uniform na DSZ, AAA su CEO Sr. Joost Meijs a expresa su gratitud na DSZ pa nan esfuersonan continuo y dedicacion na e comunidad di Aruba y pa hasi e donacion aki posibel hunto cu “Wings of Hope”. ‘Eta un honor pa nos por asisti unda cu nos por apesar di e circumstancianan y spera cu otro organisacionnan tambe por hasi mesun cos. Hunto nos tur lo lanta bek riba pia’ tabata palabranan di Sr. Joost Meijs.
