ORANJESTAD – Awe mainta Corte Superior a declara liber e homber Colombiano J.C.V. kende actualmente ta sintando castigo di 2 aña di prison. Arubanative a compronde cu awe mainta den Corte Superior a resulta cu no tin prueba contra J.C.V. pa e acusacion di ladronicia for di un casy esey a pone cu Hof di Corte Superior a declar’e liber y duna orden pa pone den libertad.
Tratamento di e caso aki ta andando pa algun luna caba, door cu mr. Illes a pidi pa investiga pruebanan cu Recherche a haya na e cas pero no a usa esakinan durante tratamento di e caso. Ta despues e abogado a bin haya esakinan. Ta trata aki di muestra di sanger y fingerprint cu aparentemente a wordo scondi. Procurador General a bay di acuerdo pa laga haci investigacion di pruebanan cu a wordo scondi di e documentonan di e caso.
Ta asina cu J.C.V. a wordo condena pa dos caso. Un di e casonan ta un asalto arma, cual J.C.V. a admiti di a haci na Juli 2018. Tambe J.C.V. a wordo condena pa un ladronicia for di un cas, cual J.C.V. ta para riba cu e no a haci e ladronicia ey. Ta asina cu J.C.V. a wordo condena na 3 aña di prison di cual 1 aña ta condicional cu un tempo di prueba di 2 aña. E abogado a apela e sentencia.
Awe mainta tratamento di e caso a sosode via video conference. E tres Huesnan di Hof ta na Curacao y via pantaya tabata mira sala di Corte di Husticia di Aruba, caminda PG y abogado mr. Illes tabata presente. Tambe tabata conecta den un oficina na KIA, caminda e acusado hunto cu traductor di Corte di Husticia tabata presente. Presidente di Hof a informa cu door cu Curacao a sera frontera cu Aruba door di e situacion di Corona Virus, nan no por a viaha bin Aruba. Door di e situacion aki a dicidi di bay trata e caso via video conference.
E resultado di e investigacion ta cu e muestra di sanger y fingerprint, no ta di e acusado J.C.V. PG. a bisa Hof cu e resultado di investigacion ta mustra cu ta un otro persona tabata den e cas y no J.C.V. PG a pidi Hof pa declara J.C.V. liber di e acusacion di ladronicia.
PG a bisa Hof cu J.C.V. a wordo condena na 3 aña di prison di cual 1 aña condicional pa e dos casonan, esta e asalto arma y e ladronicia. Awor cu mester declara J.C.V. liber di e acusacion di ladronicia, mester baha e castigo. PG. a exigi 30 luna di prison di cual 6 luna ta condicional cu un tempo di prueba di 2 aña. PG a bisa cu esey ta nifica cu J.C.V. lo ta bin na remarke pa bay den libertad condicional.
Mr. Illes a bisa Hof cu e ta comparti punto di bista di PG completo. El a pidi Hof pa laga J.C.V. liber. E sospechoso J.C.V. for di KIA a bisa cu e no tin nada di haber cu e caso aki.
Hof a dicta sentencia di biaha y a declara J.C.V. liber di e ladronicia. Hof ta confirma exigencia di PG. Hof a condena J.C.V. na 30 luna di prison di cual 6 luna ta condicional cu un tempo di prueba di 2 aña. Hof a duna orden pa laga J.C.V. den libertad.