“Un buffer durante un crisis economico no ta pa tin un biyon di florin riba cuenta di un pais. Un buffer ta ora cu ba hasi e reformanan necesario den pasado pa evita riesgonan financiero den tempo menos bon,” asina Parlamentario Richard Arends a splika durante conferencia di prensa di AVP. “Un buffer ta ora cu den un situacion di crisis bo tin bo fondonan di pensioen solvable y bo sistema bancario cu por soporta shocknan di e magnitud cu nos ta experienciando.”
“Un buffer no ta placa cash riba un cuenta. Un buffer ta ora bo mercado financiero y maneho monetario hiba pa Banco Central ta permiti banconan pa duna un moratorium riba hipoteca y fiansanan pa un periodo extendi pa esunan cu a cai atras den entrada of perde trabou. Un buffer ta pa bo tin un fondo di pensioen di empleadonan publico cu danki na e reformanan cu a wordo introduci entre añanan 2011 y 2014 awe APFA ta solvabel. Un buffer ta ora bo fondo di pensioen general SVb ta hasi yamado na Gobierno solamente pa e deficit cu e tin pasobra e ta un revolving fund – primanan cu drenta ta wordo paga di biaha na pensioen y e primanan a cay afor pa motibo di e crisis,” Parlamentario Arends a splika. “Si awe edad di pensioen tabata 60 aña manera cu a wordo prometi den campaña, e situacion lo tabata hopi mas pio. E surplus cu Gobierno ta gaba cune pa aña 2020 tabata basa riba e di dos fase di reforma fiscal cu mester e genera 200 miyon di florin cu no tabata tin sosten p’e den comunidad.”
Den e discusionnan nos ta tende hopi biaha cu e condicionan imponi pa Hulanda lo ta pa via ‘di mal maneho financiero di Gobierno anterior’. Segun Arends esaki ta un argumento cu ta wordo usa continuamente pa oponentenan politico hasta den situacion di un crisis mundial, como tambe den un situacion ocasiona pa efectonan a raiz di e medidanan cu gobierno a tuma pa por combati e contagio di e virus aki. “E condicion di Hulanda pa instituti un entidad of organo di reforma ta pa ehecuta durante 7 aña e pakete di reforma riba enseñansa, husticia, e aspecto di desaroyo economico, reformanan economico, reformanan laboral, henter e maneho social: nada cu tin directamente di haber cu finansa publico. Eleva supervision di Aruba na nivel di Reino ta algo cu fraccion di AVP ta keda lamenta, paso ta hustamente a pa motibo di e amienda cu partidonan den coalicion a aproba hasiendo e supervision financiero inefectivo,” Parlamentario Arends a splika.
E discusionan cu Hulanda a yega riba contenido di e paketenan di reforma a yega un impase. Segun Arends, e negociacionan mester wordo concentra riba e base legal di henter e Rijkswet aki y no riba e procedura cu a cana, falta di consenso of perdida di autonomia. “Ni Parlamento, ni Gobierno por cede nan competencianan consitucional na un organo di un otro Pais, den e caso aki Hulanda. Simplemente e base legal di e rijkswet pa institui e organo di reforma na robes. Nos a presenta dos sugerencia pa envolvi Raad van State den henter e asunto aki prome cu Conseho di Minister tuma un decision, como tambe alternativanan cu nos mesun Constitucion y Statuut ta brinda. Tur loke Hulanda kier regla bij Rijkswet, por wordo regla den dominio di nos leynan local,” Parlamentario Arends a termina bisando. “Ta di suma importancia pa Gobierno di Aruba hasi su posicion conoci pa loke ta trata e condicionan cu Hulanda.”