Home » Huntu nos Por Krea Fleksibilidat pa Kambio di Klima  

Huntu nos Por Krea Fleksibilidat pa Kambio di Klima  

by Admin
0 comment 84 views

 

 

 

 

 

 

 

 

 

Dutch Caribbean Nature Alliance (DCNA) a publiká un edishon spesial di nan boletin di notisia digital grátis BioNews, enfokando riba e retonan ku Hulanda Karibense ta konfrontá den e lucha kontra kambio di klima.  Nan ta hasi uso di pronóstikonan i rapòrtnan (di investigashon) akseptá internashonalmente, impaktonan tantu riba i komo bou di awa ku a deskribí pa tur e seis islanan, ku ta enfatisá e nesesidat pa akshon inmediato pa krea fleksibilidat pa e efektonan di kambio di klima. Pèrdida di naturalesa tin konsekuensianan ku efektonan negativo grandi pa poblashon lokal komo ku naturalesa ta fungi tantu komo un di e fuente mas importante di entrada i tambe ta duna protekshon kontra situashon ekstremo di wer.

 

Fuente di Kresementu di Kambio di Klima òf impakto

Nivelnan haltu di emishon di karbon ta e fuentenan mayor di subimentu di temperatura na mundu, anto ekspertonan ta pronostiká ku si esaki kontinuá sin kontrol, subimentu di temperatura na mundu lo krea efektonan katastrófiko. Pa nashonnan ku ta isla chikitu, spesialmente esunnan denter di region Karibense, esaki ta di importansia sumamente grandi. Hasta ku oumentu chikitu di temperatura, por sinti kambionan drástiko denter di e region akí. Skarsedat di awa fresku i intensifikashon di sekura i mal tempu ta algun di e preokupashonnan di mas urgente denter di e region di Karibe.

 

Importansia di naturalesa

Efektonan di kambio di klima manera awa di laman mas kayente i mas zür (blikiamentu di koral) i sirkunstansianan ekstremo di wer (periodonan mas largu di sekura i orkannan mas fuerte) por kousa daño na ekosistemanan manera refnan di koral, mondinan di palu di mangel, sabananan di yerba di laman, selvanan di áwaseru tropikal i kuebanan. E deterioro di sirkunstansianan ku nos medioambiente ta konfrontá, lo tin banda di e konsekuensianan adishonal pa un kantidat di espesie di mata i animal, konsekuensianan ekonómiko hopi grandi. E ekosistemanan ta fungi komo atrakshon turístiko importante. Ménos naturalesa ta nifiká ménos turista, ku resultado di un bahada di empleo i entrada. Ademas e pèrdida di ref di koral, palu di mangel i vegetashon lo duna ménos protekshon (na kosta) den 

 

kaso di sirkunstansianan di wer ekstremo. Ehèmpelnan di e kasonan akí por a mira despues di e orkannan Irma ku Maria, ku a kousa daño grandi na Islariba na 2017.

 

Proofing di Klima (prepará pa situashon di futuro)

Na Hulanda Karibense, nos no por influensiá kentamentu di mundu, pero nos por krea fleksibilidat kontra e efektonan di kambio di klima. Nos por redusí nos aktornan lokal di strès di manera ku nos ekosistemanan ta bira mas fuerte pa resistí e efektonan di kambio di klima.  Proofing di Klima ta e konsepto ku pa medio di invershon finansiero i akshon, por trese kambio pa hasi nos medioambiente mas fleksibel pa kambio di klima. Ora hasi esaki korektamente, e kambionan akí lo no hasi e islanan akí mas fleksibel pa e kambionan akí, pero nan lo kousa ku ta hisa e kalidat di bida pa tantu e habitantenan komo e bishitantenan, mas aleu drecha ekonomia i e areglonan sosial na e islanan.

 

E Konsiderashonnan Fundamental di Maneho di Medioambiente

E maneranan mas efektivo pa gobièrnunan redusí pèrdida kousá pa kambio di klima na Hulanda Karibense mester ta, oumentá intentonan den planifikashon di uso di área di tera i kreashon di zona (por ehèmpel: limitashon di desaroyo di tereno na kosta i oumento di reforestashon) i alabes konservashon riba tera i den laman. Otro akshonnan urgente mester inkluí komementu eksesivo di vegetashon den naturalesa dor di animalnan ku ta kana rònt sin kontrol i drechamentu di tratamentu di awa di kloaka i maneho di atendé ku shushi.

 

E Ministerionan di Agrikultura, Naturalesa i Kalidat di Kuminda, Infrastruktura i Maneho di Awa i Relashonnan Interno denter di Reino Hulandes a publiká resientemente un Nota di Maneho pa Naturalesa i Medioambiente pa Hulanda Karibense (2020-2030). E rapòrt akí spesífikamente ta proklamá e nesesidat pa krea fleksibilidat pa e efektonan di kambio di klima. Aktualmente e islanan BES ta traha ku agèndanan di implementashon pa kada isla spesífiko.

 

Kon Abo por yuda

Tin hopi kambio diario ku nos por hasi pa yuda krea un medioambiente mas saludabel i mas fleksibel rondó di nos. Esaki ta inkluí: minimalisá bo rastronan di karbon (por ehèmpel paga lusnan promé ku sali di kas), minimalisá shushi, minimalisá interakshon físiko ku naturalesa, praktiká hortikultura, skohe pa kuminda di laman i práktika di piska di forma duradero, krema solar ku no ta malu pa koral (sin oxybenzon) òf bisti paña ku ta duna protekshon, i krea interes pa un relashon ku naturalesa dor di por ehèmpel partisipá na akshon di limpiesa di playanan, na akshon di reforestashon i na proyektonan di restorashon di koral.

 

Kada isla di Hulanda Karibense ta ofresé oportunidat úniko pa krea interes pa un relashon ku naturalesa, pues no keda sin chèk ku e organisashonnan lokal di konservashon di naturalesa pa wak kua oportunidat tin disponibel den bo besindario. Respetá e reglanan i leinan di konservashon lokal i no lubidá di paga e ficho di naturalesa. Huntu nos por yuda krea fleksibilidat i forsa denter di nos rekursonan di naturalesa pa minimalisá e efektonan di kambio di klima.

 

Risibí notisia tokante di naturalesa

Keda na altura di investigashon di naturalesa i proyektonan di monitoreo den Hulanda Karibense pa medio di “BioNews” e boletin di notisia digital di Dutch Caribbean Nature Alliance (DCNA). Registrá aki, ta grátis: https://www.dcnanature.org/subscribe/

 

Mas informashon

Dutch Caribbean Nature Alliance- BioNews  special 2020- Climate change Effects & Recommendations

 

Foto:

Longspine squirrelfish: © Hans Leijnse- alle rechten voorbehouden

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio