Home » ‘BANDILAMA’ TA LANSA VIDEOCLIP NOBO TITULA ‘WALISHALI’ 

‘BANDILAMA’ TA LANSA VIDEOCLIP NOBO TITULA ‘WALISHALI’ 

by Admin
0 comment 64 views

 

 

ORANJESTAD – Diabierna ultimo, presentando un concepto fresco y diferente, e proyecto musical Bandilama a lansa nan di dos videoclip pa nan cantica titula “Walishali (ft. Jeon).” 

 

Bandilama ta un banda cu a inicia como un proyecto di e guitarista Armin Solo y drummer Jeremy Bonarriba den colaboracion cu varios otro musico y cante di ambos Aruba y Corsou. Cu composicionnan na Papiamento, haciendo uzo di zonidonan di musica popular, e banda aki a bin ta trece un ritmo tradicional den un manera moderno cu un toke di fantasia. 

 

Cada cancion presenta pa Bandilama tin un mensahe mas profundo, ilustrando situacionnan real den nos comunidad cu merece mas atencion. Den e videoclip di “Walishali”, Bandilama ta trece dilanti un mensahe pa inspira tur mucha cu ta den un lucha pa kere den nan soñonan y haci esakinan realidad apesar di cualkier obstaculo. Den e videoclip, Bandilama a presenta e mensahe aki cu ritmo Cubano di son montuno y tambe a ilustra e creatividad cu ta biba den e mente di un mucha.  

 

E tema “Walishali” ta conta cu e vocal principal di Jeon cu un interpretacion diferente di su estilo cu mayoria di su publico conoce p’e. Aki Jeon ta demostra e espectro completo di su gran talento. 

 

Tambe riba e grabacion aki tin coro di Ritmo Real y Darwin Gomes. Ademas, e cantica ta conta cu contribucion estelar di maestro Reno Steba riba baho. Jeremy ta toca drums y tur otro instrumento di percusion, mientras Armin ta toca guitara y teclado. 

 

Prome cu a lansa e videoclip di ‘Walishali’, Bandilama a lansa nan prome cancion y videoclip titula ‘Tene mi man’. Tur videoclip di Bandilama ta conecta un cu e otro den un manera cinematico pa locual ta e produccion di e videoclip. Por mira esaki bek, por ehempel, den e prome videoclip unda ta mira un raket bay laira cu ta bin bek den e videoclip di ‘Walishali’ ilustrando con un hoben ta kere den su soñonan pa haci esaki un realidad. 

 

Bandilama ta invita henter pueblo di Aruba pa bay wak e videoclip nobo di ‘Walishali’ publica riba Bandilama su pagina di Facebook y Instagram! Tambe keda pendiente via nan medionan social pa mas informacion tocante e diferente proyectonan na caminda!

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio