Home Politics Director Telefon pa Hubentud: Hobennan bou di gran presion durante e...

Director Telefon pa Hubentud: Hobennan bou di gran presion durante e pandemia aki

SHARE

 

 

ORANJESTAD -Danki na e invitacion ricibi for di Partido AVP pa participa den Encuentro Brainstorm COVID-19, pa prome biaha e organisacion Telefon Pa Hubentud tabatin oportunidad di comparti nan experiencia y descubrimentonan durante e pandemia. Hopi di e otro participantenan na e sesion di dialogo, manera sector medico, politico y di enseñanza a expresa cu esaki tabata un di e puntonan mas resaltante di e anochi cu a tuma luga diahuebs na Renaissance Convention Center.

Director di Telefon Pa Hubentud, Jason Sneek a elabora riba e presion cu tin bou nos hubentud y muchanan a raiz di e crisis di COVID-19. Un informacion cu a comparti pa pone esaki den perspectiva ta cu anualmente e organisacion ta ricibi un promedio di entre 1.500 pa 3.000 contacto di hobennan atrabes di diferente punto. Pa loke ta trata 2020, apenas entre e cinco lunanan di maart pa aworaki, e contactonan a surpasa 1.000 caba. 

Un bes cu e prome ola di contagio tabata bou control y a habri e scolnan bek, Telefon Pa Hubentud a realisa 101 workshop na diferente scol. Esaki tambe tabata un experiencia cu a habri wowo di e organisacion ya cu por a colecta informacion for di un grupo mas grandi di hoben. A sali na cla cu e preocupacionnan principal di e muchanan tabata dor di no por practica deporte, ni tin contacto c unan amistad. 

Di 1.934 mucha encuesta, e mayoria ta prefera di ta na scol cu na cas. Aki mester tene na cuenta cu no ta pa tur mucha e cas ta mas safe, pero e scol ta e lugar di mas safe. Otro punto cu e hobennan a trece dilanti ta cu adultonan ta tuma tur decision sin pidi ni tene na cuenta e pensamento di e hobennan. Tin biaha ta hustamente e falta di haya oido y tin control riba nan propio bida, ta hiba na sentimento y pensamento di suicidio, algo cu e organisacion tambe a mira.