Diahuebs 20 di augustus 2020 lo bay tin un cumbre virtual via Zoom cu algun young professionals di Aruba. Gabinete Wever-Croes ta reconoce e potencial den nos hobennan y ta desea di scucha nan pensamento riba e tema di Negosacion cu Hulanda pa e prestamo di e 3de tranche.
Compañando Prome Minister Evelyn Wever-Croes den e encuentro special aki ta bay tin dos profesional hoben. Sr. Derrick Werleman, Director di Departamento di Finansas lo duna su presentacion Rosea, cu ta un presentacion hopi detaya riba e situacion financiero di pais Aruba cu Covid-19 a ocaciona. Carlos Guiamo di Departamento di Legislacion y Asunto Huridico, DWJZ lo duna un presentacion tocante e aspectonan huridico di e ley di Reino pa e entidad y cambionan cu te ainda a tuma luga a base di e negosacion.
Un biaha mas Gabinete Wever-Croes ta demostra transparencia y lo transmit e encuentro aki via pagina di Facebook di Gabinete Wever Croes y via TeleAruba canal 13. Di e manera aki, Gobierno di Aruba un biaha mas ta haci posibel pa tur hende por sigui e encuentro aki pa asina e informacion yega tur caminda especialmente na nos hobennan.
Prome Minister Evelyn Wever-Croes ta invita tur hoben riba nos isla y pueblo en general pa sintonisa e encuentro cu young profesionals aki diahuebs awo dia 20 di augustus pa 2or di atardi.