Home » Historia di Aruba: Un dobel traicion, di amor y di ruman cu a wordo paga cu morto

Historia di Aruba: Un dobel traicion, di amor y di ruman cu a wordo paga cu morto

by Admin
0 comment 293 views

“Awo mi ta bay matanan”
“Bo no ta pa mi, bo no por ta pa mi ruman tampoco”

Aruba den pasado a conoce varios tragedia di Famia, situacionnan caminda amor tabata bay hopi leu y ta caba na un tragedia.

E historia di Aruba aki nos lo dedica na un tragedia cruel cu a sosode na Weg Fontein, Sero Cadushi. E area di Fontein ta  un area hopi peculiar na Aruba. E ta un area hopi bunita, cu a keda hopi perserva, un area keto, cu ta duna un sensacion di trankilidad y paz, pero den tur e trankilidad, paz y beyesa aki,  tabata tin cosnan hopi cruel cu a yega di sosode den e area aki.

E area di Weg Fontein/Sero Cadushi tin su historianan. E biaha aki nos lo dedica Historia di Aruba na un tragedia cruel, cu a sosode basta decada atras, mas sigur un 5 pa 6 decada pasa.

Testimonio
E interes pa haya sa mas di e sucedido aki  a cuminsa 11 aña pasa, na momento cu un persona a duna su testimonio entre algun hende. E la contanan un experiencia straño cu un dama hopi bunita cu e la topa na Carnaval y e dama a bis’e cu e ta biba na e ultimo cas na Palo Marga, na e forma cu e la describi e dama, a pone un lus cende cerca un di e personanan presente. Ora e homber a caba di duna su testimonio, e la wordo acerca pa e persona aki y kende a dun’e un informacion hopi interesante y a hibe bay mira unda esaki a sosode.

Asina nos a cuminsa cu un investigacion pa haya sa mas di e tragedia aki.

Un sucedido hopi tristo y baho
E tragedia aki a haci un daño grandi y a keda manera un mancha scur cu a afecta  henter un famia. E tabata algo asina bergonsoso pa e famia, cu te hasta nan a tuma e desicion pa sconde e sucedido aki pa nan siguiente e generacionnan cu a nace despues di e cruel sucedido aki. Pa e rumannan cual mayoria no tey mas, e tabata algo cu nan tabata desea pa e keda scondi y ta un taboo.

Esun cu sa, sa, pero famia mes e unico comentario cu nan por a duna nos tabata; “un sucedido hopi tristo y baho”.

Door di keda keto y no papia nada, un gran parti di e historianan tristo y cruel di nos isla lo a bay den graf. Danki na medionan di comunicacion moderno di awendia nos tin aceso hopi lihe na noticianan y ta haci mas facil pa acumula datos, pero den añanan 60 cu 70 e tabata casi imposibel pa haci esaki.

Un tragedia cu semper a keda papia di dje den bario
E ta un tragedia cu hopi hende cu ta biba den area di Weg Fontein ta papia di dje, hopi no tey mas, pero a pasa e informacion aki pa nan yiunan y nietonan.
Nos lo haci algun adaptacion pero nos ta hopi sigur cu esnan cu ta biba den area di Weg Fontein, lo sa di cua tragedia se trata.

Mas cu claro den e articulo aki un biaha mas nos lo uza nombernan fictioso pa protega identidad di e famia.

San Nicolas, Weg Fontein, Sero Cadushi: Tur cos a cuminsa den añanan 50 pa 60. Manera tur Mucha homber, e tempo ey ta yega e edad di namora di un mucha muher, despues ta sigui tur e proceso di pidi man, verloofd, casa y forma un hogar perfecto.

Ana, e beyeza traha na man a casa cu Buchi
Pa Buchi y Ana (nombernan fictioso)  esaki no tabata diferente. Buchi tabata un hoben cu tabata traha na LAGO, e la namora di un dama hoben, cu un beyeza compara cu un artista di cine. Un dama hoben, cu un cabey bunita, largo preto, diki, cu wowonan unico, color berde  cla, una beyeza. E curpa di Ana tabata perfecto, mas bunita cu un curpa di guitara. Ana mane antes e bieunan tabata bisa, e tabata parce traha na man, tur cos tabata perfecto.

Dokter a haci mal trabou cu Buchi y e la keda malo
Buchi tabata un homber trahado, e tabata traha na LAGO, y si ta bon nan lo a bay biba na un cas den Weg Kustbatterij. E bida tabata lora, pero te riba un dia cu Buchi lo a bira malo y mester a haci un operacion. Lastimamente cu algo a bay fout durante e operacion y Buchi nunca mas a recupera 100%. Buchi no por a move bon mas, e no por a core mas y a keda poco handicap.
Aki tabata caminda cu tur cos a cuminsa cambia. Buchi tabata haya ataca di nervio, e tabata bira razo y hopi fastioso. Ana ya no por a soporta su casa su stress, su rabia etc. Ana a cuminsa mira cu su casa no por a dun’e e debido atencion cu e tabata desea.

Eric ruman di Buchi, su casa a bay lag’e
Eric su casa y yiunan a bay lag’e, paso e ta un homber demonio
Riba un dia na un forma desconoci Ana cu ruman di Buchi, cu yama Eric (nomber fictioso) a cuminsa acerca otro. Eric, den bario tabata wordo bisa cu e ta un homber diabolico, (bisiñanan tabata conta cu Eric ta traha cu diabel, cu tur hende tabata tin miedo di dje). Eric tabata wordo considera den e bario di Fontein como un homber demonio. Segun nos a compronde cu su casa y yiunan mes a bay lag’e paso nan no por a soporta biba cu ne bou di e mesun dak. Su casa a diborcia di dje. a coy su yiunan y a bay biba na Corsou.

Eric a pasa man pa muhe di su ruman homber
Eric tabata biba su so den e cas bunita den e cunucu di casi 3 bendro, bo por bisa e ultimo cas prome cu yega lama. E cas di Eric tabata tin band’i pariba un bunita bista pa lama y band’i pabou tabata puro mondi cu cadushi, yena cu matanan di Aruba manera di Huliba. Eric a traha un cas den e cunuci ey leu y hopi bandona, caminda sigur niun hende no lo por a molesti’e ora e ta haci su cosnan straño

Parce cu na dado momento Ana no tabata por mas cu Buchi y a dicidi di bay lag’e. Ana a bay busca comprension y cariño cerca un otro, pero no a bay mucho leu di e famia ey. Ana y Eric di un of otro manera a cuminsa acerca otro.

Segun nos a compronde cu Ana lo a bay compaña cu Eric den e cas den e cunucu grandi aki. Eric cu tabata su so y mane antes nan tabata bisa di dje, cu e ta un demonio, no a worry cu ta muher di su ruman. Tur cos tabata mustra cu Eric tambe tabata enamora di Ana y asina a pasa man pa Ana, muhe di su ruman homber.

Buchi a keda su so na su cas un poco mas pazuid na Weg Kustbatterij, Buchi lo a keda stima su señora.

Eric a bay show off su muhe den bario di Fontein
Tabata riba dia di San Juan, cu Eric lo a dicidi di bay show off su muher Ana. E la bay cu Ana na un fiesta, probablemente lo tabata di dera gai na Fontein, esaki tabata den weekend.

Den e multitud di hende di bario, e pareha tabata canando man teni. Ana, bunita manera semper, a bisti cu un shimis geel y cu  un flor cora den su cabey preto Largo. Eric tabata masha orguyoso cu su logro, e la cana show e beyesa di muher pa tur hende den bario haya sa.


Buchi a haya sa di e traicion di su ruman y di su ex muher

No a dura mucho cu e informacion aki a yega na Buchi su orea y asina e la bin haya sa unda y cu ken su muhe tabata ta. Buchi no por a traga esaki, cu su muhe a bay lag’e pa su propio ruman.  Manera dianan tabata pasando, redo tabata skeiro cu Ana a bay laga Buchi y e la bay compaña cu e ruman di Buchi.

Algun dia despues di e fiesta di San Juan, ora cu Buchi a haya sa,  e amor cu e tabata tin pa Ana, a comberti den odio. E tabata sinti’e desapunta, e tabata sinti’e traiciona, mas tristo e amor di su bida a traicion’e cu su ruman.

Net un ruman cu tabata un demonio, cu tabata traha cu diabel, su señora  mes a bay corsou lag’e, paso e no tabata por a biba cu su cosnan diabolico di dje. Niun hende no tabata den sapato di Buchi pa sinti e dolor di e odio grandi cu e traicion aki a crea den su curason.

“Awo mi ta bay matanan”
Buchi a sali di su cas cu un meta cu tabata pa poni fin na e traicion aki. E la pasa na tur habitante cu e conoce den Weg Fontein, Weg Sero Preto, Weg Sero Blanco  etc. E la pasa bisa nan tur cu ” AWO MI TA BAY MATANAN”. E habitantenan a cuminsa bira preocupa, nan tabata trata na calm’e y bis’e pa e no bay, pa laga Eric y Ana pa nan cuenta, pero Buchi tabata tin hopi rabia y odio den su curpa y no tabata worry cu niun bon conseho, si no cu su unico meta di mata nan dos.

Buchi no kier a razona y tabata dicidido
Maske con facil tabata pa bisa Buchi no worry laganan, no bay matanan, niun hende no tabata den su sapato pa sinti locual e tabata sintiendo e momento ey. Buchi a bay arma cu un cuchiu grandi, direccion di cas di su ruman. E la pasa den mondi bay nort y dje bira bay pariba, direccion di e cas di su ruman. Pa motibo cu Dokter a haci un mal trabou cu Buchi, e no por a cana mucho bon, pero asina mes, e la cococha  bay direccion di cas di Eric.

Buchi a hinka y corta Ana na su nek
Na momento cu Buchi a yega na e cas di Eric, Eric mes no tabata na cas, e la sali cu su Volkswagen, pero Ana si tabata na e cas. Ariba e dak di e cas tabata tin un meneer di fam Vrolijk trahando. Vrolijk tabata haci tur trabou di mantencion riba e cas di Eric. Na momento cu Ana a mira Buchi, e la spanta,  ela presenti cu algo no tabata bon, e no kier a bay atende cu Buchi y mesora a dicidi di cuminsa core bay pabou. Buchi cu no por a core su tras, a dicidi di pasa man pa un manga di piedra, e la manda Ana cu esaki, pa su mala suerte un di e piedranan a dal Ana asina fuerte den su cabes, cu Ana a cay abou. Mesora Buchi a acerca Ana y den su rabia, e la cuminsa puñala Ana cu e cuchiu, cu su pia e la para riba e curpa di Ana pe saca e cuchiu for di e curpa y pa asina sigui hink’e.


E rabia tabata asina grandi cu ela stak’e masha hopi mes y te hasta a cort’e na su nek. Segun autoridad e nek di Ana a keda pega na un hilo. E la baha tur su furia riba e curpa cu hopi lihe no tabata duna señal di bida mas.

Vrolijk a core drenta mondi pa no wordo mata
Vrolijk cu tabata para riba e dak a mira loke tabata pasando. Buchi kier a bay pa Vrolijk tambe, e la manda Vrolijk cu piedra pero esaki a her’e. Vrolijk tur spanta a dicidi di bula for di e dak, cay riba un sero di santo y core bay nort. E la drenta den e mondi cera y a keda bon scondi, te ora cu Buchi a bay for di e sitio.

Vrolijk a duna Eric e tristo noticia
Vrolijk tur spanta a sali for di e mondi y poco mas pabou riba e caminda di Fontein e la bin topa cu Eric. Mesora e la avisa Eric cu Buchi a caba di mata Ana. Eric a spanta y mesora a bay busca polis pa compañ’e pa bay su cas. Enberdad nan a bin topa cu Ana morto den un plas di sanger. Ana tabata benta un poco mas pabou di e cas. Su shimis tabata bula y pa respet polis a pone piedra riba e shimis pa e no bula mas. Hopi lihe e noticia aki a core den bario, den e cunucu di Eric no tabata tin caminda di pone hende, hende for di tur parti di San Nicolas, tur bisiña a bay mira kiko a caba di sosode.

Buchi a pone fin na su bida
E tabata un momento hopi tristo no solamente pa famia di Ana, pero tambe pa famia di Eric y Buchi. Paso despues cu Buchi a realisa cu e la mata cruelmente e amor di su bida, e no por a biba mas cu e realidad aki y a dicidi di pone fin na su bida tambe. Despues cu e la caba di asesina Ana, Buchi a bay bek su cas y a colga su mes, poniendo asina fin na su bida. Buchi hamas lo por a sigui biba cu e traicion di su ruman y di e amor di su bida.

Monumentonan pa recorda Ana
Despues di algun dia of siman, den e cunucu unda Buchi a mata Ana, Eric lo a traha dos monumento. Un di e monumentonan ta algo parecido na un graf y riba dje e la pone e nomber original y fechanan di nacemento y di fayecimento di Ana. E otro monumento, e la traha cerca di e otro, esaki tabata un ronchi di cement blanco y den e ronchi e la traha un cruz, nan ta bisa unda e Ronchi y e cruz ta, eynan ta caminda cu Ana lo a cay y a wordo asesina. Nos por conclui cu Eric tambe lo tabata enamora di Ana, cu e la traha e dos monumentonan aki den su tereno pa  keda recorda Ana.

Eric a bay biba cerca un yiu na Corsou y a fayece eynan tambe
Eric a sigui biba su so den e cas te pariba aya, te ora e lo a bira mas grandi di edad y segun bisiñanan, un di su yiunan a bin busk’e y lo a hibe bay biba na Corsou caminda e la fayece. Tambe despues cu tempo a pasa, tabata tin papia cu habitantennan di Fontein lo a yega of tabata mira un muher bunita parecido na Ana baha for di un sero. Nos a yega di scucha otro personanan ta conta cu nan a yega di topa cu hendenan cu nan a kere cu ta hende pero cu no ta existi.

Nos di arubanative.com a haci un investigacion hopi extenso, pa haya e informacion aki. Pa protega famia nos a dicidi di uza nomber fictioso, pero mas sigur habitantenan di e bario aki lo por sa ta di cua sucedido nos a dedica nos mes na dje. Asina nos ta spera di por haya sa mas di e caso aki. Si bo sa mas di e e sucedido aki por fabor manda nos un mensahe.

Fuentanan: ta prefera di keda anonimo

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio