Home Police Atracadonan arma a bay cu un caha di placa cu 100 florin...

Atracadonan arma a bay cu un caha di placa cu 100 florin aden y a perde mayoria di e placa na caminda

SHARE

Santa Helenastraat, Oranjestad: Dialuna den careda di 10 or y 50 di anochi, central di polis a wordo informa di un atraco arma riba Pichicho Take Away, na Santa Helenastraat. Mesora varios patruya a bay na e sitio.

Na yegada e victimanan a conta polis cu tabata trata di dos hende homber hoben, bisti cu capuchon preto. Nan a drenta cu un arma di candela y a atracanan. Despues di e atraco un di e victimanan a core sali for di e negoshi y a bay bati alarma na e cas patras di e take away.

E atracadonan a logra bay cu un caha di placa y nan a core bay direccion pabou, den e caha tabata tin mas o menos 100 florin y algun placa los.

Despues cu e patruyanan na e sitio a tuma e declaracion di e victimanan, nan a cuminsa busca den area di Santa Helena y becindario. Na momento cu un patruya di polis tabata pasando den Luxemburgstraat (e hanchi pariba di Office System), nan a bin topa cu  basta placa larga tira riba caminda, mesora polis a cera e area aki pa mas investigacion. Tur cos ta mustra cu e atracadonan aki a bay direccion di Bushiri Complex. Polis a haci varios control den area aki, nan a controla auto y hendenan riba caya pero sin resultado.

Atraco team, Slachtofferhulp y departamento tecnico di polis a wordo pidi na e sitio.

CUERPO POLICIAL TA INFORMA:

Dialuna anochi pa mas o menos 10:50 central di polis ta wordo notifica di un atraco cu lo a tuma lugar riba Pichicho Takeaway situa na Sta Helenastraat. E patruya cu a yega na e sitio ta wordo informa door di e personanan den e lugar cu 2 hende homber cu capuchon preto bisti lo a dremta cu un arma di candela y atracanan.
Nan lo a bay cu e caha di placa cu lo tabata tin mas o menos afl 100,- y tambe placa larga. E dos atracadornan lo a huy direcion pabao.
Un rato despues patruya di strandpolitie lo a haya placa larga tira riba caminda direcion Bushiri.
Atracoteam a presenta na e sitio , tambe polis technico y departamanento di slachtofferhulp.
Cuerpo Policial ta haci un apelacion es cu a wak algo of sa algo jama e tiplijn cu ta 11141.