Home » PHP: Desde 1 di december 2018 no por naturalisa mas despues di 5 aña, sino 10 aña

PHP: Desde 1 di december 2018 no por naturalisa mas despues di 5 aña, sino 10 aña

by Admin
0 comment 123 views

Den un serie di comunicadonan di prensa nos a pone hopi enfasis riba e diferente articulonan den e Ley di Reino cu ta regarda nacionalidad Hulandes (‘Rijkswet op het Nederlanderschap = RWN). Nos a elabora riba e diferente formanan con un persona cu nacionalidad stranhero por bira Hulandes. Relevante pa remarca ta e stipulacion di por ehempel e duracion di e estadia legal cu un persona mester tin pa por inicia cierto procedura. Den e edicion di e comunicado aki nos lo dedica atencion specifico na e rekisito di estadia legal pa por naturalisa. Esaki no ta nifica cu e periodo di estadia legal ta e unico rekisito pa por naturalisa. Pa un relato completo tocante e procedura di naturalisacion nos ta recomendabo lesa nos comunicado di prensa anterior.

Hopi persona ta bou di e impresion cu pa por inicia e procedura di naturalisacion e lo mester conta cu un status di ‘firma liber’. Un persona lo ta den posicion di e asina yama ‘firma liber’ despues di su di dies permiso, esaki ta nifica despues di 10 aña cu cada biaha e renoba y haya su permiso. Aunke esaki actualmente ta berdad, esaki no tabata e caso prome cu 1 di december 2018.

Situacion prome cu 1 di december 2018

Articulo 8 inciso 1 sub b RWN ta indica cu no mester tin duda algun cu e solicitante lo keda residencia na Aruba, of na un di e paisnan Europeo, pa un tempo indefini. Otro rekisito ta cu e solicitante cu aplica pa e nacionalidad Hulandes, mester tabata bibando legalmente sea cu permiso pa tempo indefini of permiso pa tempo defini cu obhetivo no temporal, na Aruba, of un di e paisnan Europeo, pa por lo menos 5 aña consecutivo na momento di haci e peticion.

Ta importante pa nos por splica e dos incisonan aki bon. Segun e manual di e ley cu ta regarda nacionalidad Hulandes por papia di dos tipo di estadia legal. Un persona por tin un permiso pa un tempo indefini of e persona por tin un permiso pa tempo defini cu un obhetivo no temporal. Bou di un obhetivo no temporal ta cai entre otro e permiso pa por labora of e permiso di re-unificacion familiar.

E rekisitonan pa adkiri e nacionalidad Hulandes ta stipula den articulo 8 inciso 1 RWN. Nos ta pone enfasis riba e hecho cu e rekisitonan aki ta acumulativo, nificando cu mester cumpli cu tur:

E solicitante mester ta mayor di edad;
Di cual no tin duda algun/obhecion cu e solicitante lo keda residencia na Aruba, of na un di e paisnan Europeo, pa un tempo indefini;
Prome cu e solicitante aplica pa e nacionalidad Hulandes, e mester tabata bibando legalmente (sea cu permiso pa tempo indefini of permiso pa tempo defini cu obhetivo no temporal) na Aruba, of un di e paisnan Europeo, pa por lo menos 5 aña consecutivo na momento di haci e peticion. Cinco aña consecutivo ta nifica sin buraco algun den e permisonan;
Y cu ta wordo considera di ta estableci na Aruba door di e hecho cu e solicitante tin algun tipo di nivel di conocemento di e idioma Hulandes y Papiamento (papia, lesa scirbi y compronde), pero tambe tin algun conocemento di e sociedad di Aruba. Bo conocemento di e idiomanan y sociedad lo wordo comproba a traves di un test/prueba;
E nacionalidad Hulandes ta wordo entrega na e solicitante despues cu e solicitante declara di ta dispuesto pa duna un declaracion di conexion (verbondenheid). Despues cu e declaracion aki tuma lugar e solicitante lo adkiri e nacionalidad Hulandes.

Splicacion di articulo 8 inciso 1 sub B RWN

Sub b ta menciona lo siguiente: Di cual no tin duda algun/obhecion cu e solicitante lo keda residencia na Aruba, of na un di e paisnan Europeo, pa un tempo indefini. E termino huridico corecto na Hulandes ta “tegen wiens verblijf voor onbepaalde tijd geen bedenkingen bestaan”.

Prome cu 1 di december 2018, na momento cu bo tabata tin un permiso di por ehempel labor of re-unificacion familiar, esakinan no tabata trece duda algun/obhecion cu bo lo keda residencia na Aruba pa un tempo indefini. Nificando cu despues di 5 aña consecutivo na Aruba y naturalmente cumpliendo cu tur e otro rekisitonan menciona, bo lo por a haci un peticion pa por naturalisa. Sinembargo a bin cu un cambio drastico den e regla aki desde 1 di december 2018.

Cambio desde 1 di december 2018

Prome cu e fecha aki e tabata posibel pa aplica pa naturalisacion despues di 5 aña di tin un permiso pa tempo defini cu obhetivo no temporal, mirando cu no tabata tin obhecion algun cu e persona cu tin un permiso di labor of permiso di re-unificacion familiar lo keda residencia na Aruba pa un tempo indefini.

Sinembargo na final di aña 2018 a bin cu un cambio drastico den esaki. Awendia ta stipula cu un permiso di labor y tambe un permiso di re-unificacion familiar ta un permiso cu caracter temporal y por lo tanto, semper lo tin un obhecion na momento cu bo kier naturalisa.

Na ki momento no tin obhecion mas?

Awor aki bo mester tin un firma liber, nificando cu bo mester tin 10 permiso total, sin interupcion algun pa por aplica pa naturalisacion. Contra di un firma liber no tin ningun obhecion cu e solicitante lo keda residencia na Aruba pa un tempo indefini. Importante pa nos remarca ta cu no por tin buraco durante e permisonan aki. Si acaso tin un solo buraco, bo no ta cumpliendo cu e rekisitonan. Pa e motibo aki nos ta pone hopi enfasis riba e hecho cu prome bo aplica pa naturalisacion, controla si bo ta cumpli cu tur e rekisitonan y specificamente cu no tin buraco algun den e permisonan.

Prueba di naturalisacion

E prueba di naturalisacion pa Aruba ta consisti di 1 componente di conocimento di nos comunidad y structura estatal, 4 componente di idioma Papiamento y 4 componente di idioma Hulandes. Departamento di Enseñansa Aruba pa medio di su Examenbureau ta encarga specificamente cu e prueba aki.

Importante pa remarca ta si acaso bo persona tin un diploma of certificado Hulandes di un scol mas halto cu nivel basico y e lesnan tabata na Hulandes, bo persona no ta obliga pa haci e prueba aki.

Si bo persona ta cumpli cu tur e rekisitonan pa naturalisacion, bo por tuma contacto cu Gabinete di Gobernador pa cuminsa e procedura di naturalisacion.

Ta importante pa menciona cu den mayoria caso e solicitante mester tuma distancia di su nacionalidad actual.

Tienda di Ley a wordo forma door di un grupo di studiantenan di ley y tambe juristanan cu pa dos aña caba ta brindando asistencia juridico na nos comunidad di Aruba. Durante e existencia di Tienda di Ley nos a publica diferente articulonan juridico. Nos a trata diferente topiconan di nos Codigo Civil, Ley Constitucional, pero tambe Codigo Penal, Ley Administrativo y Ley di Labor. Nos meta no ta pa solamente brinda asistencia juridico na nos comunidad, sino tambe informa nos pueblo y comunidad di nan derechonan. Cada ciudadano di Reino Hulandes ta suppose di conose e leynan, pero hopi biaha pa falta di transparencia esaki no ta sosode. E hecho cu nos leynan mayoria biaha ta dificil pa compronde tambe ta hunga un rol. Pa e motibo aki nos ta purba di hinca e articulonan mas simpel cu nos por den otro na Papiamento, pero no tur biaha tin palabranan huridico exacto cu por wordo uza.

Ta spera cu por a informa e lector un poco tocante e topico aki. Si bo persona tin pregunta, algun sugerencia pa un proximo topico di ley of ta desea asistencia huridico por tuma contacto cu nos via nos facebook page: Plataforma Hobennan Profesional of nos e-mail: [email protected].

Scirbi pa studiantenan di ley:
Gerick Croes LL.B, B.ec
Minorca Martis LL.B

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio