Home » NA MEMORIA DI HUBERT PEREZ – UN GRAN FUTBOLISTA

NA MEMORIA DI HUBERT PEREZ – UN GRAN FUTBOLISTA

by Admin
0 comment 106 views

Cu profundo tristesa nos ta anuncia fallecimento di Sr. Hubert Perez mihor conoci como “Hubert”.

Hubert tabata un gran persona y un futbolista exemplar cu a forma parti Estrella pa un periodo basta largo, pa mas cu 15 aňa.
Hubert a inicia su careda den division di junioren y despues a pasa pa
forma parti di Divishon di Honor.

Hubert como futbolista a sabi di defende Estrella su nomber den tur forma y a hiba Estrella pa varios titulo di campeon y sub-campeon di Aruba.

Na 1976 cu 17 aña di edad Hubert a debuta den Hoofdklasse cu Estrella. E mesun aña aki el a forma parti di e seleccion hubenil di Antiyas cu a hunga den e campeonato di Concacaf na Puerto Rico.

Na 1978 el a forma parti di e seleccion Antiyano cu a hunga contra Barbados y Surinam pa e Copa François Duvalier, presidente di Haiti.

Na 1979 el tambe tawata den e seleccion Antiyano cu a hunga weganan eliminatorio contra Trinidad pa e Weganan Olimpico di Moscu 1980.

Na 1981 Hubert a hunga den e seleccion di Aruba contra Millionarios di Bogota y contra Corsou pa formacion di e seleccion di Antiyas pa e Weganan CAC na Cuba.

Na 1982 e tawata den e seleccion di Aruba cu a bay Costa Rica pa hunga 3 wega di fogeo y e mesun aña aki a forma parti di e seleccion Antiyano cu a bay Cuba pa e Weganan CAC. Despues el a hunga pa e seleccion di Aruba contra Hungria cu a bishita nos isla.

Na 1984 den e wega di playoff cu Estrella a gana San Luis Deportivo 8-0 Hubert a score 4 gol.

Na 1989 el a hunga pa e seleccion di Aruba den e torneo triangular na Corsou contra Trinidad y Corsou. El a hunga tambe pa e seleccion Arubano den e Caribbean Cup di C.F.U.

Hubert hunto cu Chommy van der Linden tabata e dos hungadornan cu den e wega entre Estrella y Dakota cu a tuma lugar na luna di october 1988, a anota e goalnan pa Estrella a titula campeon di Aruba. Por mira nan dos riba potret.

Hubert tabata conoci pa su tiro directo ariba goal y tambe pa su tiramento di penalty.

Na 1990 Hubert a hunga su ultimo campeonato cu Estrella. Durante su carera cu Estrella el a titula 5 biaha campeon di Aruba (1977, 1985, 1988, 1989 y 1990) y 4 biaha subcampeon (1976, 1978, 1981 y 1987).

Durante e 15 campeonatonan cu Hubert a hunga pa Estrella nan a clasifica 14 biaha pa playoff, solamente na 1979 Estrella a keda afo. Den tur e playoffnan aki el a score 22 gol. Tambe el a participa den 4 Copa Antiyano cu Estrella y a score 4 gol.
El a hunga varios wega pa e seleccion di Antiyas y mas cu 10 pa esun di Aruba.

Despues cu Hubert a retira como hungador estelar di Estrella Division di Honor, Hubert a milita pa varios aňa den Estrella Veterano.

Hubert, como miembro, semper a duna su cooperacion pa cu Estrella su actividadnan organisa ariba tereno di Estrella na Papilon, entre nan e famoso “Copa Betico Croes”, na unda e presencia di personanan tabata hopi grandi mes.

Estrella, cu cooperacion di Sr. Tico Kuiperi (dfm), representante di Aerocondor na Aruba, a organisa un viaje pa Cali, Colombia, na unda e dos equiponan di Estrella, esta Hoofklasse y Reserve klasse, a hunga contra otro. Hubert tambe a forma parti e viaje aki y a participa den e wega aki.

Cu fallecimento di Hubert, e famia di Estrella ta perde un miembro fiel, grand futbolista y fanatico cu semper a duna su apoyo na nos organisacion.

Acto di entiero lo tuma lugar diasabra awo, dia 15 di augusus 2020 pa 2:00 – 4:00 di atardi na misa Inmaculada Concepcion na Santa Cruz.

Directiva di Estrella futbol ta invita miembronan y fanticonan pa bin despedi di Hubert Perez riba veld di Estrella diasabra entre 1:00 pm – 1:45 pm.

Directiva di Estrella futbol ta desea su seňora, yuinan ruman- y famianan hopi forsa den e dianan aki y cu nos bon Dios tuma Hubert den su reino y pa Hubert sosega na paz.

*Danki na Sr. Fico Vrolijk y Sr. Wichi Croes pa yuda cu datosnan di e carera fubolistico di Hubert Perez.

Directiva di Estrella Futbol


Estrella na Medellin 1986

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio