Diahuebs mainta Parlamento a tene un reunion informativo cu Prome Minister Evelyn Wever Croes encuanto e ultimo desaroyonan pa loke ta trata negociacion cu Hulanda y tambe riba e maneho di gobierno pa cu covid-19.
Drs. Mervin Wyatt Ras di fraccion di AVP a mustra riba e importancia pa no solamente Parlamento haya mas informacion di e maneho cu gobierno ta hibando riba e dos asunto delicado aki pero tambe pa pueblo ta na altura kico ta spera pueblo den futuro.
“Fraccion di AVP a dirigi dos carta na gobierno den cual nos a pidi pa haya mas informacion riba e desaroyonan, ya cu gobierno mester a presenta un contra proposicion of duna un contesta riba loke Hulanda a trece dilanti.
Dia 17 di Juli pasa caba nos fraccion a manda un carta y despues nos a bolbe manda un rapel y ta te dia 11 di augustus cu ta algun dia pasa, nos a ricibi un contesta for di gobierno.
Nos ta considera esaki un sistema intransparente di parti di gobierno cual ta duna nos e impresion cu ya caba gobierno a sinta na mesa cu Hulanda y haci palabracion.
Sigur ora cu Prome Minister ta informa cu e no mester bay e reunion di diabierna 14 di augustus mas den Rijksministerraad, pues e ta na mesa cu Hulanda caba y probablemente el a palabra tur cos caba y caminda Parlamento ta simplemente wordo informa di kico ta e situacion mientras cu Parlamento no tin participacion mes den henter esaki.
Durante di e reunion cu Prome Minister Wyatt-Ras no ta anticipa cu e lo duna mucho informacion nobo riba henter e proceso cu ta tumando luga cu Hulanda of algo adicional di loke ya nos a scucha caba.
Hecho ta cu nos lo haya nos mes confronta cu dos ley di Reino. Uno ta e RAFT cu ta e continuacion di CAFT cual ta encera supervision financiero mientras cu e otro ley ta e Rijkswet cu ta encera cu lo tin un entidad cu lo bay controla tur loke ta wordo haci cu e placa cu Hulanda lo bay fia Aruba.
Loke nos a ripara ta cu a core cambia e nomber cu tabata CHE. Paso tempo nan tabata den Parlamento nan a haci yen di cherche y tira palabra, caminda Minister di Finansa actual tabata yama tur hende CHE-VIES y awor e minister y su coleganan ta haye den nan body. Mesora nan a core yama e entidad aki un organo.
A organisa un cumbre cu diferente lider sindical y comercial y tambe lidernan politico den cual gobierno a djis duna algun informacion. Pero e cumbre aki no tabata uno caminda a bin pa scucha hende pero tabata simplemente un eenrichtings verkeer caminda gobierno a djis duna informacion y a permiti esnan presente virtual haci un par di pregunta pero nada mas.
Wyatt-Ras no tin mucho speransa cu esaki lo ta otro den e reunion di Parlamento. Aki gobierno lo bolbe duna informacion y ta di spera cu no pasa manera biaha pasa cu ora cu miembronan di Parlamento a haci pregunta, e Minister a lanta bay y bandona sala.
Dor cu tur cos lo ta cla caba cu Hulanda por spera cu e promer minister no lo bay duna contestanan cla.
Sin duda cu e forma di proceder aki di gobierno ta algo di lamenta. Gobierno no por a ni logra cu loke tin riba mesa na e momentonan aki por bay Raad van State, ni tampoco Raad van Advies.
Pues tin un situacion den cual ta tuma decisionnan riba nos cabes sin cu tin nocion kico ta e consecuencianan di e decisionnan aki y segun Wyatt-Ras esaki ta un situacion cu ta lagando pueblo den hopi angustia.
Ta 37 mil ciudadano a perde nan trabou, nan no sa kico ta bay bira nan futuro, algun di nan ta haya e areglo di pago di FASE, otronan ta bin na remarke pa loonsubsidie mientras cu otronan no tin esey, ta cai tussen wal en schip, y ta haya pakete di cuminda y esaki a pone cu nos pueblo ta den un situacion di desesperacion.
Hulanda ta mustra di ta probechando di e situacion delicado aki di nos pueblo y riba dje nos pueblo no tin un Minister Presidente para den su sapatonan pa bisa Hulanda cu no nos no ta acepta esaki, cu e no ta haci e deal aki ya cu nos hendenan ta den un situacion dificil.
Al contrario loke Prome Minister a haci ta di bay full di acuerdo cu nan proposicion, ta haci loke Hulanda kier anto aki den Parlamento, ta bin conta un otro storia.
Pues pueblo tin un Minister Presidente di dos cara c’un gobierno di dos cara y un coalicion den Parlamento tambe cu dos cara ya cu nan a hari cu Hulanda den su cara pero ta bin bek aki y papia malo di Hulanda.
Esey ta e situacion cu Aruba ta pasando aden na e momentonan aki y Wyatt-Ras ta kere cu ta mustra cu Hulanda no tin confiansa den Gabinete Wever Croes.
Desde 2018 na momento cu a firma e protocol, dor di Evelyn Wever y Xiomara Ruiz Maduro y despues a bin e asuno di e ley di CAFT y kier a adapta e ley aki, por a mira con e dos caranan di e gobierno di Evelyn a manifesta su mes.
Un banda Minister Presidente ta bay di acuerdo cu Hulanda pa bin cu e ley adapta di CAFT pero di otro banda ta bin Parlamento y sostene un cambio den e mesun ley aki cu el a acorda cu Hulanda.
Eynan Hulanda a mira cu kende e ta dialogando y a bisa cu esaki ta inaceptabel y nan a cuminsa haci dificil cu Aruba den e caso aki y ta eynan e problemanan a cuminsa,” Parlamentario Mervin Wyatt Ras a declara.