Home Interviews VIDEO ATTACHED: Negoshi grandi dilanti Postkantoor tur luna, na momento di paga...

VIDEO ATTACHED: Negoshi grandi dilanti Postkantoor tur luna, na momento di paga Bijstand

SHARE

Tur luna dia di pago di bijstand, for di mainta trempan por mira varios conocido bendedonan di droga, para bou e mata di kwihi dilanti postkantoor na Oranjestad, nan ta warda pa e adictonan caba di cobra, pa entreganan nan placa, tambe por mira algun otro personanan cu no ta cobra bijstand yega eybou pa un of otro transaccion.

Algun ora largo nos a observa  homber y muher  (mayoria adicto) cu tabata pasa entrega placa, documento etc. y te hasta varios (pa no bisa tur) cu tabata haya un sakito pa nan bay cu ne.

Paga debe y cumpra

Nos a bay haci nos investigacion y a puntra rond, un adicto a contanos con esaki ta funciona. E la contanos cu tin varios bendedo di droga cu ta provide nan cu droga, te hasta tin dealer cu ta exigi paspoort y tambe e caarchi di cobra bijstand for di nan como garantia. Henter luna e adictonan ta haya droga for di e dealernan aki te na e suma cu nan ta cobra di bijstand. Asina nan yega nan limiet, e adictonan lo mester bay horta, bay laba auto, prostitui, of pidi placa pa nan por haya mas droga.

Tur luna riba e dia cu ta paga Bijstand, for di oranan trempan di mainta, e dealernan lo ta bin cu e ID nan y e caarchinan di cobra bijstand di e adictonan, nan ta entrega esaki na e adicto, djis pa e por bay cobra y manera cu e bin bek pafo, e mester entrega e placa completo y e caarchi na su proveedo di droga,  pa asina e keda haya droga na balor di locual e ta haya di bijstand.

Un adicto cu a paga loke e debe

Tin adicto cu ta haya 450, pero tin cu ta afgekeurd y ta haya 900 florin, dus ta hopi placa e bendedonan di droga ta cobra tur luna indirectamente for di bijstand. Por ehempel Si cada un di e dealernan aki tin djis 20 adicto bou dje y 5 ta haya 900 y 15 ta haya 450 florin di bijstand, ya caba ta 11.250 florin tur luna. Mas adicto e dealernan tin bou di nan, mas placa nan ta cash in tur luna. Riba dje sin conta e resto di luna cu e adictonan tin cu cumpra droga adicional.

Segun nos a compronde cu e dealernan aki ta inverti un suma di placa den droga, esaki nan ta cushin’e na nan cas, bentando tur sorto di kimico/veneno den dje, nan ta trah’e na piedra. E dealernan aki ta traha saco di 20, 10, te hasta di 5 florin y asina e adicto mester e ta dun’e su saco. Te ora e yega su limiet cu ta na balor di su bijstand.
Riba e fecha di paga bijstand, no ta na e Postkantoor na Oranjestad so tin e negoshi aki, den tur bario dealernan ta para ta warda e adictonan cobra pa kita nan placa for di nan. E Adictonan no tur ora ta bon pagado, un dealer femenina mester a subi su bais, core bay busca un adicto cu no a bay cobra of lo a sali bay sin entrega su placa na e dealer. Tin algun di e dealernan cu no ta confia si por tin recherche tin bista riba nan y nan ta haci’e mas disimula, nan ta haci e transaccionnan di placa, documento y droga un den auto. Esaki ta pasa hopi liher, e dealer y adicto ta subi den auto y den algun seconde nan ta baha for di e auto. Nos a observa cu e bendedonan ta usa V car y tambe Nissan March pa haci nan transaccionnan. Segun nos a compronde for di un adicto, cu e adictonan tin hopi miedo di nan dealernan paso nan ta depende di e dealernan aki pa nan adiccion.

Skina parti zuid di Postkantoor

E negoshi aki dilanti di Postkantoor tin basta aña tumando lugar y te awe niun dia autoridad no lo a cay riba dje ainda. Den pasado durante un investigacion di ladronicia, autoridad a haci un entrada hudicial na un cas di un di e dealernan, nan a  drenta e cas di dealer y a bin topa cu 30 caarchi di cobra bijstand y tambe 30 paspoort di adictonan.  Polis a confisca esakinan y despues cu e adictonan a admiti modus operandi aki, e dealer aki haya algun luna so di castigo di prison, e la sali te cu e ta sigui cu e negoshi clandestino aki, te hasta por mire riba un di e potretnan “trahando” den su negoshi di droga.

E Caarchi di cobra bijstand y Paspoort ta un garantia (pand) pa e bendedonan por haya nan pago di e droga cu nan ta provee e adictonan cu ne.

Na Aruba tin varios dealer haciendo e negoshi aki, di provee adictonan cu droga. Den e mundo aki cada bendedo tin algun adicto bou di dje, cu e so ta provee nan cu droga. E adictonan no por bay cerca un otro dealer, paso ta bin problema grandi entrenan, bringamento cu lo por bay for di man.  E bendedonan di droga si ta bibando hopi bon di e negoshi clandestino aki, cu te hasta despues di cobra e adictonan, nan ta bay Casino, Supermarket etc..

Placa cu pa ley ta destina pa un hende humilde sin trabou pa sobrevivi di dje temporalmente, ta wordo entrega indirectamente na esnan cu ta manteniendo e indice di adiccion halto na Aruba, cu ta dañando tur dia bida di otro, causando tristezanan grandi den hogarnan, causando tur sorto di abuso y haciendo famianan hopi dolor.

E adictonan no ta haci nada otro cu e placa di bijstand aki, di otro banda ta diferente instancianan, iglesianan, diferente restaurantnan den playa y cuidadanonan di bon curason henter luna ta pasa duna e adictonan aki pida cuminda. Paso e placa di bijstand ta wordo kita for di nan den porta di Postkantoor door di e bendedonan di droga, cu mane djaka ta para dilanti di e MFAnan y Postkantoor.

Un bon idea lo ta si por a cambia esaki, enbes di duna e adictonan riba caya placa, cuminsa dunanan bon di cuminda, cada un bon cu nan nomber y fam, cu nan so por bay busca cuminda na cierto supermarketnan. Esaki especialmente pa e adictonan riba caya, paso Gobierno No por sigui indirectamente dunanan placa pa droga. Otro idea lo ta si por cambia e leynan na Aruba y bin cu un ley den cual ta haci afkick di droga algo obligatorio, pa asina hinca e adictonan obligatoriamente den un centro pa nan rehabilita.

Imagennan di e fila dilanti Postkantoor

Mientras otro ta lucha pa sobrevivi den e pandemia cu tin mundo henter den su gara, di otro banda e placa cu e adictonan ta cobra di bijstand tin un solo destino, esey ta pa cumpra piedra pa nan huma. Nos ta spera cu pronto bin un fin na e negoshi baho aki cu ta tumando lugar publicamente tur luna na momento di cobra bijstand.