Home » Ex-Prome Minister Nelson Oduber: “Sin placa, stoma bashi of un autonomia tur manca”? 

Ex-Prome Minister Nelson Oduber: “Sin placa, stoma bashi of un autonomia tur manca”? 

by Admin
0 comment 90 views

 

 

Den e bida aki pa tur cos cu bo kier logra bo mester haci un escogencia, mescos ora bo ta goberna un pais. Nada ta bay sin sacrificio y ta depende di bo habilidadnan pa negocia con leu bo por bay y kico por ser acepta. Den pasado nunca Hulanda tabata kier a duna cooperacion pa nos por a determina nos propio destino. Ta cu hopi sacrificio den pasado nos por a yega unda nos ta awe. Ta conoci cu nunca ora MEP goberna gobierno Hulandes a yuda nos cu nada fuera di locual cu condicionnan nan mes por a controla. 

 

Implementacion di KB di 11 di juli 2014 

Desde 1986 cosnan grandi a sosode cu nos desaroyo den tur sentido cu nos pais. Aruba a tuma riesgonan economico/financiero hopi grandi mes  pa por a crece nos turismo y nos mes al final sin Hulanda su ayudo mester a paga e cuenta. Cu tin cos cu por a bay miho, esey ta sigur, pero si nos no a intenta nada lo a tuma lugar y nos lo ta na unda nos lo ta awe. Cos a cuminsa bay malo ora a cuminsa fia placa pa cosnan mucho grandi cu economia chikito di un pais chikito, manera di nos, no por genera suficiente placa pa paga bek y keda cumpli cu nos propio  “huishouden”. Aki cos a bay completamente fout. Gobierno di Hulanda a actua mucho laat cu KB di 11 di juli 2014, unda a kita completamente nos autonomia financiero. Pa yuda Mike Eman dilanti eleccion 2017 Hulanda a bay di acuerdo pa bin cu e ley aki cu ta contra nos constitucion y Statuut pa introduci CAFT. Mi a skirbi den pasado varios articulo ariba e cos aki cu e ta inconstitucional. Apesar di CAFT, Hulanda mes a coopera di 2013-2017 pa redobla e debe nacional cu 2 biyon florin y cu otro 2 biyon florin na e proyectonan PPP cu nan mes a pidi gobierno pa no firma nan, pero tur a continua y e compromiso financiero a ser haci toch! A bin eleccion na 2017 y si POR a bay traha cu AVP lo cos a continua, pero a bin un coalicion – no esun mas preferi – pero esaki tabata e realidad politico. No obstante ministro cera, negoshi cu tereno, permiso cu bo gusta of  laga, AVP a sali e partido cu mas voto. Esaki ta e realidad politico con pueblo mes a vota. 

 

Nos economia paralisa

Tur hende cu sa algo di gobernacion tabata sa cu e gobierno nobo ta para dilanti retonan financiero demasiado grandi cu lo mester bay corta y haci hopi sacrificio. No obstante e estorbonan aki mi tin cu admiti cu hasta den e di 2 presupuestonan a logra bin cu un surplus, pero e debenan si cu nos mester keda paga 25 aña largo mas cu 85 miyon florin extra pa aña y e interes so di casi 300 miyon florin pa aña ta mucho grandi pa nos economia asina chikito keda produci e placa pa paga nan. Pa e desaster financiero ta completo, na maart ultimo aki a dal mundo y nos tur cu Covid 19 cu a caba cu e resto di nos finansa publico y economia. Mi a skirbi na maart ultimo cu si e pandemia dura 3 te 6 luna nos por cremencha want’e, pero mas cu 6 luna ta paga luz! No tin placa di divisas ta drenta, mucho negoshi lo cera y mucho hende sin trabao y henter bo economia tambe ta paralisa y te ainda no tin luz na  horizonte ni na final di e tunnel cuanto tempo mas. Expertonan rond mundo cu nos tur ta depende di nan conseho ta mas bruha cu un pushi lora den un bol di hilo. Hasta tin ta bisa tur dia cu e Corona Virus lo no bay nunca mas y siña biba cu ne! 

 

Sentido comun di responsabilidad

Ata nos a bay di acuerdo cu art. 36 di Statuut pa bay pidi Hulanda fia nos placa. Di e momento aki e “koopmanschap” y caha di triki di Hulanda a ser poni den gear. Nan sa mescos cu nos cu nan lo ta na e momentonan aki e unico cu lo por yuda nos fiando nos placa. Como cu e otro islanan tambe ta den e mesun problema, Hulanda a grap su oportunidad unico di pone nos tur bao di su “paraplu“, locual semper desde cu mi a siña conoce nan den politica tabata nan intencion. Nan sa cu placa lo caba fin di e luna aki, por ta ningun hende lo cobra den gobierno y no tin placa pa yuda esnan den sector priva tampoco! Un gobierno responsabel pa su pueblo hamas por laga e situacion yega asina leu, pero kico ta e prijs cu nos kier bay paga?  E parti cruel, “meedogenloos”, sin piedad, abusado, criminal di gobierno Hulandes ta cu nan ta negocia a la fuerza di un politica di “take it or leave it”. Nan a haci’e cu Indonesia, Nieuw Guinea, Surnam y bo ta kere cu nan lo tin un tiki sentido comun di responsabilidad pa cu nos pueblo? Cu sin Hulanda lo bo no tin placa y lo muri hamber? 

 

Tur pais ta den problemanan grandi

Mi a negocia 36 aña den varios funcion cu politiconan Hulandes. Nan ta bira hasta inhumano y onsportief ora ta trata di placa! Nan no tin ningun sentido di sentimento pa nos argumentonan di pasado y den esaki tur politico Hulandes ta pensa mescos! Por ta mi ta kere cu den bida tin ora bo mester “retreat for a better position”, cu cos lo no keda mescos y cu mescos despues di 1986 nos ariba nos propio forsa lo por desaroya un economia cu lo por yuda nos crea entrada, trabao y un futuro pa tur hende. E ta exigi si cambio radical cu tin hopi cos cu nos mes lo no tin placa pa nan mas. Mester amplia e sentido comun di responsabilidad di nos tur cu nos mes lo bay paga e cuenta. Corda no tin ningun experto na mundo cu por pronostica kico ta bay pasa cu e desaroyo economico mundial. Tur pais ta den problemanan grandi, un mas cu otro y e realidad ta cu nos tur mester bay yuda y coopera cu otro pa sali afor. Nos futuro na e momentonan aki ta insigur y financieramente instabil. Nos debe e generacion aki y nos yiunan un miho futuro. 

 

Esaki ta un contribucion personal haciendo uzo di poco experiencia y conocemento politico cu ainda mi tin y di situacion cu mi mes a pasa aden desde preparacion di Independencia di Surnam den varios grupo di trabao  cu mi tabata aden y sa mas of menos con cos ta bay. 

P.S. Corda purba lobby un tiki cerca esnan cu ainda por ta stima nos un poco!

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio