Home » AHATA: Iniciativa local ta facilita proceso pa bishitantenan di Merca

AHATA: Iniciativa local ta facilita proceso pa bishitantenan di Merca

by Admin
0 comment 49 views

ORANJESTAD, Aruba: Algo importante pa sobrevivi e temponan aki ta sa con pa adapta na e circumstancianan nobo. Esey ta exactamente loke Bats Media & Consulting a haci. E compania local ta sigui di cerca e desaroyonan den sector turistico y a crea un solucion cu ta facilita e proceso pa bishitantenan Mericano yega Aruba.

E pagina www.rapidtesttravel.com ya caba ta online. E ta un guia facil pa haya e luganan cu ta haci testnan di Covid-19 den 72 ora, of menos, na Merca. E biahero ta yena e nomber di su ciudad y ta haya sa inmediatamente unda pa bay y haci e prueba cu e tin mester pa por biaha pa nos isla.

Julien de Bats, fundador di e compania cu a desaroya e webite ta splica cu el a tuma nota di e comentario di hopi turista Mericano den gruponan di media social exprensando nan frustracion door di no por haya un luga cerca di nan pa haci e asina yama ‘rapid test’. Esaki a bira un reto adicional pa nan, ya cu no tabatin un website cu ta indica cua ta e luganan na cada estado.

“Hopi a scoge pa no bin Aruba, pasobra nan no por haya un luga. Nos kier hacie mas facil pa nan, y di e manera aki, aumenta e fluho di turismo pa nos isla,” de Bats a bisa. “E idea ta yuda cu loke mester pa e turistanan caba di haci su reservacion. Nos kier duna turistanan e experiencia mas agradabel pa bin Aruba.”

E luganan ta varia entre di hospital y laboratorionan for di Texas pa Rhode Island, y for di Florida pa California, te na sucursal di e cadena di boticanan mas grandi na Merca manera Walgreens y CVS. Tur e establecimentonan aki tin e capacidad pa haci e ‘rapid test’ y duna resultado bek, den 72 of 48 ora, y algun hasta den apenas 24 ora.

E website ta interactivo den e sentido cu e usuarionan por raporta luganan cu no ta cumpli den entrega e resultado di nan test den 72 ora. Tambe por verifica e luganan cu ta cumpli cu loke nan ta priminti, fuera di e verificacion cu e creadornan di e pagina mes ta haci independientemente. Por ultimo, e usuarionan por añadi luganan nobo na e lista pa asina otro hendenan den nan mesun area tambe por sa di esakinan.

Bishitando www.rapidtesttravel.com ta masha facil paso djis door di haci un click, bo ta conecta telefonicamente cu e luga pa haci un afspraak. Di mesun manera ta hiba bo na e website di e facilidad mes caminda por ricibi mas informacion y splicacion di e procedura y rekisitonan pa realisa e test.

Bats Media & Consulting ta invita tur negoshi den sector turistico pa comparti e link di e website, esta https://rapidtesttravel.com/, cu nan clientenan como un herment pa haci nan preparacion di biahe pa Aruba, algo mas facil y placentero. Tambe por bisa amigo y famianan di dje, of compartie riba media social pa asina yuda e pilar economico di nos pais pasa e momento dificil aki.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio