Nos a drenta un fin di siman cu informacion di hopi casonan positivo di Covid. DVG tempran diabierna atardi a indica cu tin un total di 133 caso di 1060 test haci. E gran parti di e personanan no ta mustra ningun sintoma y no tawatin ningun hende cu mester a bay hospital pa haya atencion medico. Prome Minister Evelyn Wever-Croes un biaha mas, ta haci un apelacion na henter pueblo di Aruba, esaki ta un momento pa nos mustra disciplina.
Nos ta drentando un fin di siman, un fin di siman cu nos mester keda paden mas cu ta posibel. Corda cu tin samenscholings verbod kiermeen si Polis wak bo riba caya cu un grupo e lo kibra e grupo for di otro. Bo no ta permiti pa ta riba caya, den parkinglot ni riba beach, niun caminda, cu mas di 4 persona. E unico excepcion ta si ta un famia cu ta biba bou di un dak.
Un otro apelacion cu Prome Minister ta urgi tur hende ta pa nos cuida esnan vulnerabel. Esnan cu ta riba 60 aña, esnan cu tin problema cu pulmon (asthma entre otro), problemanan di presion halto, diabetes, problema di riñon, esakinan ta e pashentnan cu nos mester cuida pa evita cu nan wordo contagia. Na momento cu nan wordo contagia, nan ta rekeri asistencia medico y nos no sa si nos por duna esaki si hopi hende bira malo pareu.
“P’esey aworaki mi ta conta riba disciplina di ciudadanonan pa keda paden y cuida esnan mas vulnerabel”.
Si bo ta un persona cu a bay den contacto cu un persona cu a test positive, no bay den panico, keda bo trankil. Especialmente si bo no tin ningun sintoma. Isola bo mes, bay den cuarentena boluntario. Si bo tin contacto cu hende, uza mondkapje, yama bo dokter pa bo haci un cita pa bo haci bo test y sinta trankil warda bo resultado.
“119 caso no ta cos di haci wega cu ne. E ta algo hopi serio, pero nos ta prepara pe. Nos tawata prepara pe y nos ta prepara pe. P’esey awe nos por a haci riba 1000 test cu ta cantidadnan record. Pero ta mustra cu nos strategia ta funcionando, nos preparacionnan ta funcionando. Lamentablemente e situacion a sali for di man cu e brote aki. Pero mes lihe cu e cifranan a subi cu e brote aki, mes lihe nos ta determina pa baha nan bek y trece e pais aki bek na normaildad. P’esey mi ta conta riba bo. E biaha aki si mi ta conta cu bo lo duna di bo parti pa nos yuda pa nos caba cu e crisis aki nan. Cu Dios bendiciona cada ciudadano di nos pais”, Prome Minister a finalisa bisando.