105
ORANJESTAD, Aruba – Departamento di Salud Publico a tuma nota di un laboratorio cu ta ofrece comunidad e covid-19 anti body test. Na e momento aki DVG ta descurasha comunidad pa haci esaki pa e siguiente motibonan.
- Anti bodies ta wordo produci dianan of asta simannan despues di contacto cu e virus. Esaki nifica cu si recientemente bo a bin den contacto cu e virus, bo curpa lo no tin suficiente anti bodies ainda y bo resultado lo no ta confiabel.
- E cantidad di anti bodies den bo curpa tambe ta wordo influencia pa bo estado di salud general, bo edad, bo nutricion, malesa y diferente mas factornan por tin influencia riba e cantidad di anti bodies.
- Anti body test ta wordo uza mas bien pa mira si e persona den pasado tawata tin e virus. Den un brote manera esun cu Aruba ta pasando den dje na es momento aki, e test aki no ta adecuado y p’esey no ta wordo conseha.
Pa por maneha un brote mester por señala kendenan tin e virus actualmente y esaki ta posibel solamente cu un POLYMERASE CHAIN REACTION (PCR) TEST cu ta e metodo usa rond mundo pa detecta e particulanan di e virus cu ta presente actualmente den e parti patras di e nanishi y garganta di e persona infecta..
Departamento di Salud Publico ta conseha tur persona cu ta desea di haci test di covid-19 pa acudi na un laboratorio cu ta ofrece PCR TEST of acudi na bo dokter di cas si bo ta presenta sintoma di covid-19.