Partido MEP a tuma nota di atakenan di parti di Benny Sevinger contra lider di MEP Evelyn Wever-Croes. Un declaracion yen di mentira, den cual, segun Benny Sevinger, ta yama lider di MEP pa corupto. Aki e dicho den papiamento crioyo ta bon aplicable: porco sushi ta busca muraya limpi pa frega su curpa.
Benny Sevinger ta un sospechoso di corupcion, corupcion na gran escala, cu henter Aruba tabata testigo di dje. E sospechonan di e delitonan di Benny Sevinger ta:
1. Labamento di placa
2. Abuso di poder
3. Acepta soborno y placa bou mesa
4. Falsificacion di documento
5. Desfalco y estafa
Esaki segun Ministerio Publico ta locual cu Benny ta culpabel di dje. Anto net Benny kier papia di integridad? AVP no tin ningun otro hende pa papia di integridad?
FAMIA DI EVELYN WEVER-CROES
Lider di MEP numeroso biaha a desenmascara Benny y AVP. Y ta bolbe haci’e:
Ni su tata Hendrik ni su omo Rudy ta traha p’e y tin tur prueba pa mustra esey.
Glenbert Croes y Endy Croes ta hendenan cu a wordo scogi pa pueblo y no ta traha pa Lider di MEP.
E casa di Lider di MEP y e yiu di Lider di MEP tampoco ta traha p’e; nan ta traha na airport prome cu Lider di MEP a drenta den gobierno.
Ta hopi importante pa Benny Sevinger realisa cu su problemanan cu husticia ta hopi serio y stop di busca muraya limpi pa frega su sushedad y mentiranan.
CASO ROBERTO RINCON
Kico tabata e caso aki? Roberto Rincon ta un sponsor grandi di partido di Benny. Recientemente a sali publica donacionnan gigantesco cu Roberto Rincon tabata haci na partido AVP, e universidad di corupcion.
A cambio di sponsor miyonario, Roberto Rincon a haya kico cu e tabata kier, tereno, edificio. Tur cos. Y ken a dun’e esakinan? Benny Sevinger! E caso aki yama caso AVESTRUS y ainda Benny mester responde den e caso aki.