Recientemente un cabayero a fayece di kemaduranan serio cu e la haya na su curpa.
Hopi biaha den casonan di accidente di trafico, candela etc. den cual victimanan ta keda gravemente herida, hopi lihe tabata opta pa mandanan cu air ambulance pa Colombia y cu den dos pa tres ora nan ta na un Hospital pa un tratamento medico mas avansa y den varios caso a scapa bida di e victimanan tambe.
Actualmente esaki no ta tur ora posibel mas, despues cu e pandemia di COVID 19 a inicia, no ta facil mas pa yega manda hende den exterior pa tratamento medico. Manera tabata custumber AZV tabata tin un bon relacion cu varios hospital na Colombia, pero durante e Pandemia, Colombia a cera su fronteranan y ainda ta den gara di Covid 19.
Esaki sigur tin su consecuencianan na momento cu un persona haya un accident y mester wordo manda cu un air ambulance pa exterior. Actualmente Colombia y varios otro pais den region tin hopi exigencia y tambe varios pais nan fronteranan ainda ta cera, cual ta haci’e mas dificil ainda pa Aruba manda un hende malo pa tratamento medico den exterior.
Colombia tabata semper un bon opcion, e distancia ta cortico y e tratamento medico tabata hopi bon. Awendia mester evalua si por manda pashentnan Merca of Hulanda, pero e distancia ta hopi largo y tambe ta depende con serio e situacion di e pashent ta y si e por biaha oranan largo den avion.
Pa e motibo aki AZV na varios ocasion ta pidi e pueblo pa porfabor cuida curpa, evita cu accidentenan serio sosode, paso no ta facil mas pa manda un persona den exterior.
Ban cuida nos mes y ban trankilo den trafico, evitando asina accidentnan cu por tin consecuencianan lamentabel pa nos of pa un di nos sernan keri.