Home Local Hobennan a disfruta di un siman di Gang di Arte y Dream...

Hobennan a disfruta di un siman di Gang di Arte y Dream Dare Do

SHARE

ORANJESTAD – E aña aki atrobe e proyecto “Gang di Arte” y “Dream Dare Do” a uni pa duna hobennan oportunidad di demostra nan talento.
Gang di Arte (GDA) ta un proyecto di Departamento di Cultura bou di auspicio di Minister di Cultura cu a inicia na aña 2007. Meta di GDA ta pa ofrece un plataforma di arte unda hubentud por expresa diferente disciplina den arte.

Dream Dare Do (DDD) ta un proyecto organisa pa Popcorn Club. Meta di DDD ta pa crea, encurasha y fortalese lidernan hubenil, tambe pa descubri, motiva y engrandece hobennan cu ta interesa den arte.

Mirando cu ambos proyecto tin meta similar y ta tuma luga den vakantie grandi, a dicidi na uni e dos proyectonan aki. E aña aki ta di dos aña cu e dos proyectonan aki ta traha hunto y por bisa cu satisfaccion, cu apesar cu mester a haci cambionan den planificacion pa motibo di covid-19, e tabata un biaha mas exitoso.

Den e siman di 20 pa 24 di juli, un cantidad di 105 hoben a ricibi tayernan di e.o. baile di diferente genero, teatro y musica serca lidernan hoben na Scol di Arte. Hobennan cu ta biba pabou por a haci uzo gratis di bus cu ta busca nan mainta 8:30 am na Plaza Betico y hibanan na Scol di Arte te cu 4:30 pm.

E resultado di tayernan a wordo extrena dia 27 di juli na Cas di Cultura. Por a disfruta di 1 ora di show unda cu hobennan a presenta diferente genero di baile bou di e tema “Evolucion” den 2 funcion. Esaki ta incera bailenan riba canticanan di 1950 te cu 2020. Tambe a presenta un cancion cu a wordo produci y graba pa e hobennan mes.

Departamento di Cultura ta gradici Popcorn Club, UNOCA y tur cu a duna nan sosten pa e proyecto di GDA y DDD por a logra su meta, apesar di circunstancianan.