ORANJESTAD – Awe mainta Hues di Corte di Husticia di Aruba, a dicta sentencia den e caso penal cu Ministerio Publico a cuminsa contra un grupo di 5 homber Latino, sospecha di a transporta 2253 kilo di cocaina abordo di e tugboat “Garcia”.
Aruba Native por a compronde cu cuater tripulante a wordo declara liber mientras cu e capitan di e tugboat ta wordo haya responsabel pa e droga. Guarda Costa a intercepta e tugboat Garcia riba 14 October 2019 den awanan territorial di Aruba y durante investigacion a bin haya e lote di droga aki scondi den un bodega.
Hues a bisa cu e ta haya legalmente proba cu a importa un lote grandi di cocaina. E droga tabata distina pa Trinidad Tobaco. Hues a mustra cu Fiscal a indica cu lo tabatin botonan go fast cu lo a hiba e droga abordo di Garcia ora e tabata navegando den awanan territorial di Aruba.
Hues a bisa cu no por prueba cu ta go fast a hiba droga riba tugboat. No tin nada di esey riba radar. Cu e boto a wordo controla na Cartagena, Colombia y no tabatin droga pa autoridadnan di Colombia, no tin prueba di esakiNa opinion di Hues, no por exclui cu e droga tabata den e bodega scondi ora e boto a sali for di Colombia. El a mustra cu tur e sospechosonan ta bisa cu nan no tabata sa di e droga. Hues ta haya cu no tin indicacion cu e cuater tripulantenan, Y.C.M., C.C.H., J.C.R. y H.R.L. tabata sa cu e droga tabata abordo. Na opinion di Hues, e tripulantenan tabata riba tugboat pero no tin indicacion cu nan mester tabata sa cu e droga tabata abordo. Hues a declara tur cuater tripulante liber y a duna orden pa pone nan den libertad.
Pa loke e capitan H.H.C., Hues ta haya cu e capitan ta responsabel di e cargamento di e boto. Hues ta di opinion cu e capitan mester a investiga cu e boto no tin droga. Hues ta haya cu e capitan a keda sin investiga e bodega.
Pesey Hues ta haya cu e capitan H.H.C. ta responsabel pa e lote di droga. Hues a bisa cu e ta tene cuenta cu e cantidad grandi di droga y a condena H.H.C. na 10 aña di prison. Hues a bisa cu tanto Fiscal como e capitan por apela e sentencia.