Home » Passionate Love: Un fase transitorio

Passionate Love: Un fase transitorio

by Admin
0 comment 127 views

Bo ta corda e gevoel di barbulet den bo stoma na inicio di bo relacion?
Esaki ta caracteristico pa e fase di ‘passionate love’, cu ta dura un averahe di algun luna pa dos aña despues di a conoce bo pareha. Passionate love ta un estado psychologico cu ta dominabo completamente. Den e estado aki bo ta experiencia un preocupacion casi obsesivo pa e otro persona; bo no por stop di pensa riba dje. Bo ta admira y idealisa e persona aki te na e extremo, cu bo no ta reconoce su fayonan. Emocionalmente, e estado di passionate love ta caracterisa pa un atraccion sexual explosivo, y un gevoel frecuente di extasis na momento di comparti cu e persona. Ora bo no ta fisicamente cu e persona, bo por experiencia un gevoel di tristeza, cu lo por manifesta su mes asta den forma di dolor fisico. Na nivel fisico, bo lo por sinti tambe un pulso acelera, sodamento, barbulet den stoma, bloos of otro señalnan di excitacion. Mientras cu e sentimentonan aki por ta hopi fuerte den e periodo inicial di un relacion, nan intensidad lo baha cu paso di tempo.
Hopi hende ta kere cu na momento cu e fase di passionate love pasa, nan relacion a caba. Mester tin algo robes cu nan relacion, pa cual motibo nan no ta sinti mescos cu na cuminsamento. Nan ta conclui, cu nan no ta stima nan pareha mas y algun ta asta opta pa laga nan famia en buskeda di e sentimentonan di excitacion y extasis cu, segun nan, tur relacion amoroso ta ‘suppose’ di tin.
Un di e cosnan mas importante – y na mesun momento mas dificil – den relacion ta pa reconoce cu e barbuletnan den stoma y e sentimentonan euforico inicial no lo keda existi pa semper, y cu esey ta algo normal. Sentimento di pasion so, no ta e unico base pa un relacion solido y duradero. Claro cu ta existi casonan, den cual un pareha a ‘click’ inmediatamente, a casa dentro di algun luna y tin e bendicion di ainda por ta hunto den un relacion feliz y satisfactorio, pero e casonan aki ta mas bien excepcional, y no mester lubida cu hopi pareha ta haci nan best pa aparenta un relacion perfecto y duradero cu en realidad ta no-existente.
Manera kisas abo mes por a ripara den bo bida, passionate love ta algo cu ta desaroya su mes prome cu bo conoce bo pareha bon. Durante e periodo transitorio aki, lo por tin ‘red flags’ cu ta wordo ignora completamente, door cu e sentimentonan pa e otro persona ta asina fuerte, cu nan ta strobabo di mira e persona pa ken e ta realmente. Mescos cu den bida en general, den relacion no tin ningun garantia. Pero un cos ta sigur: E estado di ‘passionate love’ ta carece di logica. Door di esaki, hopi hende cu ta tuma decisionnan impulsivo pa formalisa nan relacion den un convivencia of matrimonio den e estado iracional aki, ta ignora advertencianan obvio pa (futuro) problemanan di relacion of un relacion toxico y abusivo.
No ta pornada cu mi recomendacion principal semper ta, y lo keda: Play it safe y tuma bo tempo pa conoce bo pareha bon prome cu bo formaliza bo relacion.
Desiree Swaen
Certified Life, Relationship & Intimacy Coach
www.ds-lovecoach.com

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio