Home » Kowloon Restaurant ta celebra 45 anniversario

Kowloon Restaurant ta celebra 45 anniversario

by Admin
0 comment 108 views

E siman aki Kowloon Restaurant ta celebra su anniversario di safiro. Riba diamars 28 di july 2020 ta net 45 aña cu e la habri su portanan na Playa. Cu e logro aki mesora, Kowloon ta bira e restaurant mas bieu na Aruba. Un logro sigur danki na e clientenan cu generacion tras di generacion a sa di sostene e restaurant. Y tambe pa e empleadonan cu a bira un famia extendi di famia Arends.

E COMIENSO
E fundador, Ernesto “Netto” Arends dfm, a recorda e comienso di Kowloon Restaurant durante un entrevista na juli di 2015. “E berdad ta cu mi idea inicial tabata pa cuminsa un Deli Shop, pero na caminda a cambia di idea”, Netto a cuminsa conta e tempo ey. Asina el a corda inicio di su plannan pa bay den negoshi di restaurant, mientras cu e mes tabata trahando na DOW e tempo ey. E kier a purba algo otro y e mesun negoshi ey (Kowloon) a celebra 40 aña na 2015, cu a gosa di bon temponan y a sa di surpasa tur mal tempo tambe. “Nos ta Arubiano, unda nos ta bay? Ta aki nos ta keda lucha, cu si cos ta bon of menos bon” Arends a bisa e tempo ey.

HOPI AÑA DI SACRIFICIO Y DEDICACION
Hopi aña di sacrificio y dedicacion a percura pa no solamente Kowloon bira e restaurant mas keri na Aruba sino e miho restaurant Cantones di e isla, maneha pa un Arubiano. “Mi ta orguyoso di ta e unico Arubiano cu a sa di hiba un restaurant pa 40 aña, sigui pa Sra. Alicia Botta di El Gaucho pa 38 aña”Arends a bisa e tempo ey. “ Es mas, nos ta considera cu nos ta un empresa cu 30 empleado cu ta papia nos idioma papiamento, cu tambe ta sirbi como un aporte pa comunidad”, Arends a sigui bisa na 2015. Arends mes a fayece na Februari 2018, lagando su yiu muhernan encarga cu e restaurant.

INOVACION Y MODERNISACION
Kowloon Restaurant durante e 45 añanan di existencia, no a para keto.” Nos a sigui cu tempo y a inova y modernisa nos restaurant continuamente. Nos 45 añanan ta danki na nos fiel clientenan y nos team dinamico. Tur e ingredientenan aki hunto a haci Kowloon Restaurant e restaurant Cantones di tur famia Arubano, caminda e custumber di bishita nos restaurant ta sigui di generacion pa generacion”. Por ta e exito mas grandi sigur ta e hecho cu mayoria cliente di comienso di e restaurant awe ainda ta bishita e restaurant cu nan famia.
Un logro cu ta haci cu Kowloon, 45 aña despues di su apertura, ta sigui mas fuerte cu nunca. Danki Aruba!!!!

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio