ORANJESTAD, Aruba; 28 juli 2020. Departamento di Salud Publico a tuma nota di un keho publico cu a wordo haci den un medio di comunicacion.
DVG ta lamenta cu Sr. Rincon Derves a opta pa acudi prome na prensa enbez di yama e departamento conerni cual ta DVG y puntra pa ayudo of busca pa sa si enberdad algo por a bay robez den asunto di su resultado.
DVG normalmente no ta bay publico cu informacion di ningun persona, nos ta respeta privacidad di tur persona, sinembargo na momento cu un persona mes opta pa bay prensa no ta keda DVG otro opcion cu trese aclaracion y e berdad pa nos comunidad.
Tur persona cu yega Aruba for di exterior ta haya instruccion pa download un app cuta yama *Aruba Health app*. Atraves di e app aki tur persona ta haya su resultado di e test cu nan a haci na Aeropuerto.
Den nos sistema nos por observa cu sr Rincon a downloud e app cu a wordo instrui na dje y ela provee su email na su yegada tambe.
Atraves di nos sistema tin registra cu sr Derves a ricibi su resultado di test via su app exactamente 10:30 di anochi riba e mesun dia cu ela yega Aruba, esta diahuebs dia 23 di juli. Na momento cu e resultado a wordo manda pa e app di e persona e resultado ta drenta tambe via email adress di e persona. Esaki ta e proseso den caso cu eta uno negativo.
Si e resultado ta positivo e persona ta wordo yama y tur instruccion ta wordo duna pa e warda bishita di DVG. Di e forma aki tur dia un promedio di entre 200 pa 300 resultado di test haci na Aeropuerto ta wordo manda pa tur persona cu yega Aruba.
Unbez mas DVG ta lamenta cu ta bay prensa sin cu ta busca informacion corecto prome na e departamento conseri. Pa cuakier pregunta por yama DVG na telefoon 5224200 of por contact nos via facebook riba Directie Volksgezondheid DVG Aruba of tambe bay na e website: www.arubacovid19.org na e seccion; haci bo denuncia.